Dëshiron apo jo, një pjesë e shoqërisë shqiptare dhe shumica e drejtuesve të “rilindjes”, Lulzim Basha është faktor politik bazë, në raportet pozitë-opozitë dhe, pavarësisht shijes së kreut të qeverisë, ka detyrim të ulet me të, si kryetar i një partie, me mbështetje jo të vogël elektorale.
Basha kërkon pushtet, por nuk po e largon dot, një kryeministër të “dekompozuar” moralisht e ligjërisht, nga lidhjet me krimin, nga korrupsioni e dështimi total në qeverisje, që megjithëse “ka mbathur këpucët” e ikjes, hiqet si i fortë, kërcen tallava me gratë e administratës dhe këndon me kalamajt e fshatrave, kur opozita proteston e përleshet me policinë.
Shkak, nuk është fuqia e Ramës, sepse tashmë ai është “kryeministër dordolec”, por është karta e djegur morale e opozitës së bashkuar, me përbërje shtabi drejtues, akoma Sali Berishën Monika Kryemadhin, Ilir Metajn, Fatmir Mediun e ca bishtra të tjerë të së shkuarës së errët, të cilët, Rama po i përdor me sukses, si “gogol” në çdo takim e deklaratë që bën dhe me plotë të drejtë, megjithëse është vetë si ata, mbrojtës e mos-ndëshkues i tyre.
Nga sa kemi dijeni, një nga pikat e marrëveshjes ndërmjetuese ndërkombëtare Rama-Basha më 17 maj 2017, kur PS ishte akoma në koalicon me LSI, kishte si objektiv, nxjerrjen e dyshes Metaj-Kryemadhi nga fronti i majtë dhe nxjerrjen e Berishës, nga “bunkeri” i të djathtës.
Kjo skemë, që nisi me bashkëqeverisjen PS-PD, u kulmua me spostimin dhe izolimin e Ilir Metës në Presidencë e vazhdoi gjatë fushatës, kur Rama-Basha sulmonin egërsisht e paralelisht, partinë LSI dhe krerët e saj, më të njëjtën “gjuhë”, siç kundër-sulmonte dhe çifti i vetmuar presidencial.
Kësaj marrëveshjeje hermetike, Lulzim Basha nuk iu përmbajt, i thyer nga diktati tutorial i Sali Berishës, si dhurues i cdo pushteti “llokum” në qeveri e parti, duke i hapur derën LSI, si palë në koalicionin opozitar, ndërkohë që Rama e nxorri jashtë pushtetit, ndërsa ndërkombëtarët e damkosën, si parti me vota vendesh pune, mielli, lekësh, licencash, koncesionesh e minista dhe drejtorë hajdutë.
Nuk e dimë, nëse e ka kuptuar apo jo Basha, por ribashkimi PD-LSI, krijoji reagime të forta tek shqiptarët e madje, edhe urrejtje brenda antarësisë demokrate, mbasi kjo “rimartesë” e idelogjisë blu me ideologjinë e kuqe, nuk u konsiderua bashkim programesh për shqiptarët, por si lidhje private Berisha-Metaj, për të rimarë pushtetin e Ramës.
Dihet, që PD ka mbështetës dhe këtë e tregojnë pjesëmarrjet në protesta, por ky masivitet është një kontribut opozitar i shkuar për “dhajmë qeni”, për shkak se në krahë e në krye, ka akoma Sali Berishën, këtë ish-politikan cikël-mbyllur që nuk frymëzon më, figurën e të cilit, kryeministri “përbindësh” korrupsioni e IKON lidhjesh me krimin, po e përdor si “gogol” psikik tek shqiptarët.
Nëse ndërkombëtarët, e shikojnë Bashën, si një e nesërme pushteti qoftë edhe më 2021-shin, apo më vonë, vetë Lulzim Basha, duhet të kuptojë, se mbi vullnetin e tyre ka një votë shqiptarësh, që e pengon dhe pushteti, nuk është si kolltuku në PD, me urdhërues Saliun, me kryetar komisioni Jeminin, me numërues votash djalin e Fahriut dhe me certifikues Nishanin.
Ndaj, para se të këndojë “Himnin Kombëtar” nën degët e shkurreve të SHQUP-it, Lulzim Basha duhet të ftillohet e të mos bëjë më opozitë, me “gogolët” Berisha, Metaj, Kryemadhi, Mediu etj në krahë e në krye, mbasi jo vetëm është kohë e humbur me protesta të humbura, por është “serum” demagogjie populiste për krye-dordolecin Rama, që i zgjat sundimin e degraduar./Pamfleti
