Vishet me shumë mister dhënia e nënshtetësisë shqiptare për dy vëllezërit indianë Nitin Sandesara dhe Chetankumar Sandesara nga ana e presidentit Ilir Meta. Dy ditë më parë kreu i shtetit pranoi skandalin se i ka pajisur ata me pasaportë shqiptare, ndërsa fajin ja hodhi ministrit të Turizmit dhe agjencive ligjzbatuese.
Por në këtë mes ka shumë pikëpyetje. Sigurisht që Blendi Klosi ka përgjegjësi të madhe, por ai që duhet të bënte verifikimet është presidenti Ilir Meta. Kreu i shtetit tha se agjencitë ligjzbatuese e kanë cilësuar të pastër.
Por kjo deklaratë vishet me dyshime, pasi mjafton një kërkim i thjeshtë në internet dhe e zbulon se kush janë dy vëllezërit indianë. Ata kërkohen për pastrim parash në shumë shtete të botës dhe ka shumë artikuj për ta. Por ajo që tregon implikimin e presidentit është se vëllezërit Sandesara kanë depërtuar deri në Kosovë falë nënshtetësisë, duke u miqësuar me kryeministrin Ramush Haradinaj, mik i presidentit Ilir Meta.
Ky i fundit është parë shpesh kohët e fundit në dreka e darka me të, ndërsa kanë bashkëpunuar dhe për të ndaluar ndryshimin e kufirit Kosovë-Serbi. Më 22 shkurt të këtij viti, Chetankumar Sandesara ka pasur një takim me Haradinjan dhe madje ky i fundit e ka publikuar dhe në rrjetet sociale. Por kjo gjë ka sjellë mjaft reagime në mediat kosovare, të cilat vunë në dukje faktin se indianët janë të kërkuar ndërkombëtarisht për pastrim parash. Për këtë çështje dy ditë më parë ka reguar për mediat këshilltari i Ramush Haradinajt, zoti Halil Matoshi.
Ai ka publikuar në rrjetet sociale dekretin e Metës që u ka dhënë atyre nënshtetësi shqiptare, duke fundosur presidentin tonë. Sipas tij, takimi me Hradiajn dhe depërtimi i tyre në Kosovë është bërë sepse ata janë dhe shtetas shqiptarë. “Vëllezërit Sandesara gëzojnë imazh të mirë publik në Shqipëri – ata janë shtetas shqiptarë!
Lajmi plot bujë, në disa portale të Prishtinës, për kinse ndalimin me qëllim ekstradimi të dy qytetarëve indianë dhe me shtetësi shqiptare, (shih: Dekreti i shtetit shqiptar) Nitin Sandesara dhe Chetankumar Sandesara nga Interpol- në Aeroportin e Rinasit, është i paverifikuar dhe ashiqare përkon me fushatën denigruese ndaj kryeministrit të vendit, duke parë ngritjen e reputacionit dhe besimit popullor për të”, thuhet në reagim.
Por ky reagim nxjerr zbuluar Metën, pasi tregon se si falë nënshtetësisë së tij, ata e kanë zgjeruar rrjetin e tyre të aktivitetit dhe kanë takuar Haradinajn.
Justifikimet e Metës dhe Haradinajt
Ajo që bie në sy është se si Presidenca, ashtu dhe Kryeministria e Kosovës, kanë përdorur pothuajse të njëjtat argumente. Edhe pse indianët kërkohen në të gjithë botën për mashtrim dhe pastrim parash në vlerë deri në 725 milionë dollarë, Meta e Haradinaj janë shprehur se ata janë verifikuar dhe rezultonin të pastër. Për këtë arsye lindin një sërë pyetjesh: Si ka mundësi që si kryeministri i Kosovës, dhe presidenti shqiptar nuk e zbuluan se kemi të bëjmë me mashtrues? A kanë kërkuar ata vërtet të verifikohen? A është ky një dështim i shërbimeve informative, apo indianët janë ndihmuar politikisht? Deri më tani SHISH dhe institucionet informative të Kosovës nuk kanë reaguar.
Meta sfidon SHBA
Me dhënien e nënshtetësisë për dy indianët e shumëkërkuar, presidenti Ilir Meta u ka dhënë një tjetër goditje të madhe amerikanëve. Kohët e fundit Meta po sfidon hapur SHBA, pasi ka dalë kundër paktit Kosovë-Serbi për kufijtë, ndërsa ka kthyer sytë dhe nga Moska. Po ashtu, ai kërcënoi amerikanët se do i luftojë si Allende i Kilit. Por me shtetësinë që u ka dhënë vëllezërve Sandesara i ka sfiduar sërish.
Ata janë në kërkim dhe në SHBA. Fillimisht kanë investuar atje dhe pasi u zbuluan e u arratisën, duke gjetur strehim te ne falë presidentit dhe ministrit të Turizmit. Pra duket se kohët e fundit sfidat e Metës ndaj amerikanëve janë shtuar. /Kliti Topalli
