Zbardhen detajet se si amerikanët fundosën kreun demokrat Lulzim Basha për skandalet e tij me lobimet. Dy ditë më parë prokuroria deklaroi se ka prova që vërtetojnë se Partia Demokratike nuk ka deklaruar 650 mijë dollarë të shpenzuara për lobime në SHBA. Vetë Lulzim Basha kërkoi nga organi i akuzës që të tregojë letër-porositë që i kanë ardhur nga Uashingtoni, pasi sipas tij, nuk është e vërtetë se ka fshehur shpenzimet.
Gazeta zbardh sot të gjithë dokumentet që ka marrë në dorë prokuroria nga Departamenti Amerikan i Drejtësisë, që vërtetojnë se si PD deklaroi vetëm 25 mijë dollarë shpenzime dhe fshehu 650 mijë dollarë të tjerë. Dokumenti i parë është një kontratë e datës 22 mars 2017, e firmosur mes Lulzim Bashës dhe Nicolas Muzin, kreu i kompanisë “Muzin Capitol Partners”. Në të bihet dakord mbi kushtet mes palëve, ku “Muzin Capitol” në këmbim të lobimeve për PD në administratën amerikane, duhet që të merrte 3 pagesa, në vlerën totale të 25 mijë dollarëve.
Deri këtu duket gjithçka normale. Por në lojë ka hyrë më vonë kompania “Biniatta Trade LP”, me seli në Skoci, e cila ka derdhur fonde pranë “Muzin Capitol” për llogari të Lulzim Bashës. Prokuroria ka siguruar nga amerikanët kontratën e bërë mes “Muzin Capitol” dhe “Biniatta Trade LP”. Kontrata mban datën 22 mars 2017 dhe është bërë për llogari të lobimeve të PD. Aty palët bien dakord për një pagesë prej 150 mijë dollarë në 3 muaj. Po ashtu kompania angazhohet të bëjë dhe një pagesë prej 500 mijë dollarësh në kuadër të disa takimeve në SHBA.
Te koka e kontratës si subjekte jepen: “Muzin Capitol” dhe Partia Demokratike e Shqipërisë. Kjo kontratë është deklaruar në Departamentin e Drejtësisë më 14.11.2017 pra, gati 9 muaj me vonesë gjë që ka rritur akoma më tej dyshimet. Të dyja këto kontrata, pra ajo mes “Muzin Capitol” dhe PD dhe “Muzin Capitol” dhe “Biniatta Trade” janë në duart e prokurorëve.
Deklarimi i financave
Prova vendimtare që fundos Partinë Demokratike është ajo e deklarimit të financave që ka bërë “Muzin Capitol”. Përmes partnerëve amerikanë, prokuroria ka në dorë tabelat e plota me të gjitha derdhjet që janë bërë në arkën e kompanisë në emër të Partisë Demokratike. Sipas dokumenteve, pagesa e parë është kryer më datë 24.03.2017 nga “Biniatta Trade LP” në vlerën e 150 mijë dollarëve, në emër të PD.
Pagesa e dytë është bërë nga vetë Partia Demokratike më 27.03.2017 në vlerën e 25 mijë dollarëve. Ndërsa është deklaruar gjithashtu se në datë 09.06.2017 janë paguar nga PD 500 mijë dollarë. Pra në total janë 675 mijë dollarë të deklaruara nga Muzin pranë autoriteteve amerikane. Ai është shprehur se këto para ai i ka marrë për të lobuar për PD.
Ja si mashtroi PD në KQZ
Sipas ligjit, çdo parti duhet të deklarojë shpenzimet për fushatë, përfshirë dhe lobimet. Por çfarë deklaroi PD në KQZ? Sipas të dhënave të bëra publike nga vetë Komisioni Qendror i Zgjedhjeve dhe po ashtu nga të dhënat që ka prokuroria, PD ka deklaruar rreth 120 mijë euro shpenzime lobimi për disa kompani të tjera për zgjedhjet e 2017.
Më konkretisht ka deklaruar: Konsulenca “Barnes & Thornburg LLP”, 6.385.000 lekë; Konsulenca “Barnes & Thornburg LLP”, 6.200.000 lekë; Konsulenca “Clearpath Strategies” 1.820.109 lekë dhe Konsulenca “Murphy Vogel ASKEË”, 1,534,000 lekë. Pra në total 15.939.109 lekë, ose rreth 120 mijë euro. Por në KQZ, PD nuk kishte deklaruar asnjë pagesë për “Muzin Capitol” dhe asnjë kontratë me “Biniatta Trade LP”.
Por pasi “BIRN” denoncoi skandalin, KQZ i dha mundësi PD të deklarojë shpenzimet dhe ajo ka deklaruar se ka paguar plot 25 mijë dollarë për “Muzin Capitol”. Por Nicolas Muzin në SHBA ka deklaruar plot 675 mijë dollarë, ndërsa Basha shprehet se ka paguar plot 25 mijë dollarë.
Kjo do të thotë se janë fshehur 650 mijë dollarët e tjerë. Por sipas të dhënave që prokuroria ka marrë nga Skocia, pagesat prej 650 mijë dollarë janë bërë në emër të PD nga “Biniatta Trade LP”, kompani që ka lidhje me rusët. Pra, duket qartë se amerikanët kanë fundosur kreun demokrat, pasi në bazë të të gjithë kontratave vërtetohet se PD fshehu 650 mijë dollarë financime. /Kliti Topalli
