Kryeministri Edi Rama është sot në Elbasan ku po zhvillon mbledhjen e qeverisë. Në një prononcim për median Rama tha se rruga Elbasan-Tiranë do të finalizohet brenda këtij viti.
Gjithashtu Rama tha se jeni në diskutim për të transformuar kombinatin metalurgjik në Elbasan. Ai gjithashtu tha se po finalizohet një aks i ri rrugor mes Elbasanit dhe Beratit.
“Me kënaqësin ë e kësaj pamje të papritur për mua, dëshiroj të ndaj me ju disa momente të Këshillit të Ministrave.
Çdo muaj jemi në një qark jo për ekskursion apo turizëm, por për të qëndruar dhe shkuar në çdo pjesë të aktivitetit të zonës për të kontaktuar drejtë për drejtë me njërzit, për të mbajtur shënim çfarë dëgjojmë e për të përcjellë mesazhet tona.
Kemi dy probleme të trashëguara, dy gropa që kemi bërë përpjekje për t’i mbushur por ende nuk e kemi bërë plotësisht.
Kam parasysh rrugën Elbasan-Tiranë dhe rrugën tjetër Qukës-Qafë Plloc, projekte skandaloze. Jemi të vendosur të realizojmë rrugën brenda këtij viti të hapet.
Kemi diskutuar edhe për projektin e transformimit të zonës së ish-Metalurgjikut, gangrenë e të shkuarës, ku jemi të fokusuar në çuarjen përpara të vizionit të kompleksit të parqeve industriale, gjë për të cilën po punojmë intensivisht.
Kemi marrë vendimin për të finalizuar reformimin e strukturës së vjetër dhe të degraduar të drejtorive të bujqësisë, nuk do kemi më drejtori të tilla.
Nga 13 drejtori bujqësie, sistem parazit, në 4+4 agjenci rajonale, ku njëra do ketë si qendër Elbasanit.
Ne do forcojmë agjencinë për zhvillim rural më shumë, do krijojmë instrument real në duart e atyre që kanë nevojë për garanci nga pikëpamja veterinare.
Këto agjenci do sjellin një vlerë të shtuar, jemi të vendosur të garantojmë në tërësi të gjithë zinxhirin që e përbën këtë sektor jetik për vendin, këtë motor kaq potencial ende të pashfrytëzuar si duhet”,– tha Rama.
