Parlamenti ka miratuar dje ndryshimet në përbërjen dhe axhendën e Komisionit të Posaçëm të Reformës Zgjedhore, duke i hapur rrugë ndryshimit të sistemit zgjedhor. Pas debateve të zhvilluara mes deputetëve socialistë dhe përfaqësuesve të opozitës së re, të gjithë u dakordësuan për të miratuar ndryshimet sa i takon reformës zgjedhore. Me 90 vota pro, u vendos që komisioni të ketë 12 anëtarë, ndërsa objekt i punës së tij do të jetë dhe ndryshimi i sistemit.
Por me ndryshimin e sistemit zgjedhor, pritet që shumë parti të vogla në vend, përfshirë dhe LSI, të marrin një goditje të fortë. Vetë Rudina Hajdari në një intervistë televizive tha pak ditë më parë se do propozohet rrudhja e partive dhe të futet një sistem i ri zgjedhor, ku ka hedhur idenë e sistemit mazhoritar. Por nga reforma e re zgjedhore, goditjen më të madhe pritet që ta marrë LSI, ashtu siç ndodhi në vitin 2008.
Por çfarë po ndodh realisht? Nga dita në ditë rriten dyshimet se kemi një bashkëpunim mes PS dhe PD në realizimin e reformës zgjedhore. Për muaj me radhë Taulant Balla dhe Oerd Bylykbashi punuan bashkë për të hartuar një draft konkret për ndryshimin e Kodit Zgjedhor. Për herë të parë u fut ideja e depolitizimit të komisioneve zgjedhore, ndërsa po ashtu u përcaktuan disa dispozita për votimin e numërimin elektronik. Drafti shkoi më pas në Kuvend, por nuk gjeti dot rrugën e miratimit për shkak të përplasjeve PD-LSI.
Por çdo ditë e më shumë po jepen sinjale se PS e PD janë bashkë për të mbyllur Kodin e ri. Bashkëkryetare e komisionit do jetë Rudina Hajdari, e cila duket se nuk e dogji mandatin për të mbajtur në “vathë” deputetët e rinj që po futen. Po ashtu, në Parlament po futen shumë njerëz të besuar të Lulzim Bashës, të cilët kanë deklaruar se do japin votën pro reformës zgjedhore. Për sa kohë PD ndodhej në Parlament, nuk votohej dot drafti.
Por tani gjithçka është e mundur. Nuk është çudi që juristët e PD të fshihen dhe pas propozimeve të deputetëve të rinj për ndryshimet në Kod.
Risitë e reformës
Përmes anëtarëve të rinj të komisionit të reformës, parashikohen ndryshime rrënjësore në sistemin zgjedhor. Sipas burimeve, po punohet të futet sistemi mazhoraitar, ku të votohet për kandidatë dhe jo për partitë. Nëse ndodh kjo, atëherë PD-PS janë më të favorizuara pasi janë parti më të fuqishme dhe kanë mundësi të vendosin kandidatë më të “fuqishëm”. Por një pikë tjetër do jetë ajo e eliminimit të pjesës dërmuese të partive të vogla, pasi në vendi tonë janë mbi 100 parti.
Partitë e vogla duan korrektim kombëtar dhe lista të hapura, duke mbajtur sistemin aktual. Por sipas burimeve, PS nuk pranon asnjë prej tyre. Kjo do të thotë se do kemi një sistem të ri. Nuk është çudi që të kemi dhe një sistem me “prim”, apo të rikthehet sistemi i dikurshëm, ku 100 deputetë zgjidheshin nga qytetarët dhe 40 të tjerë në tavolinë. Pra sinjalet janë se do shkojmë drejt një sistemit ku kemi shumë pak parti.
Përveç PS e PD, këtu të rrezikuar janë të gjithë të tjerët, përfshirë dhe LSI. Gazeta ka mësuar se partia e presidentit ka filluar të shqetësohet, pasi në vitin 2008 e pësoi nga ky sistem që kemi. Megjithatë, mbetet të shihet se çfarë do vendosë komisioni, por e sigurt është se në zgjedhjet e 2021 do shkohet me një sistem të ri politik. Në Parlament janë 109 deputetë dhe në një farë mënyre, Basha po e ndihmon PS ta mbyllë procesin. /Kliti Topalli
