Gentian Hoxha, me vendim të Gjykatës së Tiranës është lënë në burg pasi u arrestua tre ditë më parë. Arrestimi i tij u bë menjëherë pas shpërthmit që ndodhi në dyqanin e tij të celularëve.
Në dëshminë e zbardhur nga Panorama, mësohet se hoxha i ka mohuar të gjitha akuzat ndaj tij. Hoxha u shpreh: “Më erdhi një pako dhe shpërtheu”.
Sot gjykata ka vendosur masën e sigurisë “arrest me burg” për Hoxhën, i cili akuzohet për ‘Prodhim dhe mbajtje të armëve dhe municioneve luftarake’.
Në spitalin e Traumës kanë shkuar prokurori Ervin Karanxha dhe gjyqtarja Shefkie Demiraj, të cilët i kanë komunikuar masën e sigurisë Hoxhës.
Në tavolinën e punës së tij u sekuestruan 3 detonatorë dhe 2 kapsolla të pashpërthyera.
Ekspertët morën edhe monstra nga pluhuri i tritolit, ndërsa të gjitha materialet mësohet se shërbenin për të montuar mina me telekomandë.
Ndërkaq, nga burimet policore mësohet se po verifikohen disa persona që mendohet se kanë lidhje me Hoxhën, ndërsa kjo linjë e bombave me celular ofronte materialin kundrejt një çmimi prej 1500 eurosh.
