Historia e pronës që do të tregojmë tani është sa komike, por edhe e trishtë.
Bëhet fjalë për ish-Kampin e Punëtorëve në Sarandë. Hotelin e famshëm “SANTA KUARANTA”. Në media dhe opinion publik njihet si hoteli i Klement Balilit, i ashtëquajtur “Eskobari i Ballkanit”. Por, pak njerëz e dinë që ajo në fakt është pronë sindikate. Si çdo kamp punëtorësh, në vitin 1992 kjo godinë i kaloi Bashkimit të Sindikatave të Pavarura. Më pas, në vitin 1997, me akt dhurimi, Gëzim Kalaja ia kalon këtë pronë një sindikate të vetme, Sindikatës së Ushqimit, Tregtisë dhe Bankave.
“Akti i dhurimit thotë shprehimisht: me aktin e dhurimit zhvishet nga e drejta e pronësisë BSPSH, dhe e vetmja pronare e ligjshme bëhet Sindikata e Pavarur e Ushqimit, Tregtisë dhe Bankave. Ky akt dhurimi është hiptotekuar në ZRPP Sarandë në datën 29/5/2000”, tha Maksim Mebelli, Sindikata e Ushqimit.
Por, sindikata shumë shpejt e gjeti veten të hedhur në gjyq nga familja Balili. Gjyqi përfundoi brenda një muaji dhe mori formën e prerë në favor të Bashkim Balilit, vëllait të Klement Balilit.
Por këtë proces gjyqësor, sindikata nuk ishte fare në dijeni.
“Bashkim Balili ka hapur një gjyq se gjoja ka marrë me qera nga BSPSH, ish kampin e punëtorëve në Sarandë. Në një kohë që BSPSH këtë pronë e ka dhuruar në 97”, tha Maksim Mebelli Sindikata e Ushqimit.
Ky konflikt pronësie nga viti 2000 e deri më sot ka shkuar plot 3 herë në të 4 shkallët e Gjyqësorit. Momentalisht pritet një vendim nga Gjykata e Larte si dhe nga Strasburgu.
Maksim Mebelli dhe kolegët e tij Sindikalistë të mbrojtës të puntorëve, sot kanë përfunduar në menaxherë pronash. E gjithë energjia e sindikalizmit, të gjitha kuotat që merren nga anëtarët, shkojnë për gjyqin e pronave.
“I kemi rënë në qafë të gjithë sindikatës si komisionit drejtues, si këshillit kombëtar, si asamblesë, si sindikatave që kanë paguar nga kuotat e tyre shuma maramendëse për 19 vjet gjyq”, tha Maksim Mebelli Sindikata e Ushqimit. /Top Channel
