Opozita do të protestojë sot para Kryeministrisë, ndërsa sinjalet janë se mund të kemi skenarë dhune. Berisha ja ka bërë të qartë Bashës disa herë se Rama duhet të rrëzohet pa hyrë qershori dhe kjo e shtunë mund të jetë shansi i fundit. Për këtë arsye sot priten dhe incidente. Turma pritet që të tentojë sërish të mësyjë në Kryeministri.
Por policia e Garda kanë marrë masa. Kryeministria, Ministria e Brendshme dhe Parlamenti janë rrethuar në mbrëmje me kangjella e rrjetë hekuri. Po ashtu, policia ka hartuar një plan operacional mbi menaxhimin e protestës, ndërsa në gatishmëri do jenë blindat e ujit, forcat “Shqiponja” dhe ato RENEA.
Duhet theksuar se ditëve të fundit kanë qenë Monika Kryemadhi dhe Sali Berisha ata që kanë paralajmëruar një ’97- të dytë, ndërsa Basha është më i tërhequr. Frika e njerëzve të Bashës është se mbështetës të Berishës dhe Kryemadhit mund të provokojnë incidente. Ndërkohë, mund të ketë zhvendosje të turmës edhe para Kuvendit, pasi aty hapësira është më e ngushtë dhe policia vihet në vështirësi.
Mbetet të shihet se çfarë do ndodhë, por sinjalet e ditëve të fundit janë të qarta se Berisha e Kryemadhi janë të gatshëm të bëjnë gjithçka për destabilizimin e vendit.
Reagon Basha
Kryetari i PD Lulzim Basha ka vijuar me kërcënimet se ditën e sotme opozita do rrëzojë qeverinë. Ai dje zhvilloi takime në Kamëz e Kavajë, dy bastionet e PD, ku u kërkoi qytetarëve që të protestojnë para Kryeministrisë. Në Kavajë, ai deklaroi se kjo është një betejë për jetë ose vdekje. Basha u shpreh se shqiptarët kanë përpara vetes betejën më të madhe për t’i dhënë fund tranzicionit të tejzgjatur në vend. Për Bashën, kjo është përballje vendimtare dhe pa kthim.
“Shqipëria ka 6 vjet që përjeton dhunë e përdhunë nga Rama dhe banditët e tij. Kjo është një betejë për jetë ose vdekje. Shqiptarët kanë përpara vetes betejën më të madhe për t’i dhënë fund tranzicionit të tejzgjatur në vend. Kjo është përballje vendimtare pa kthim. Pushtetarët janë pasuruar si derrat, ndërsa kryefamiljarët shqiptarë janë në burg dhe kanë vuajtur burgime për mospagim të energjisë elektrike. Përmasat e depresionit social, ekonomik dhe psikik të shqiptarëve në 6 vjet morën përmasa të jashtëzakonshme.
Protestuesit e vazhduan rezistencën para arrestimeve arbitrare, përpara Prokurorisë së kapur, jemi sot ballë udhëheqjes së kësaj lëvizje kombëtare Kemi zgjedhur të ndërtojmë Europën këtu”, tha Basha. Ndërsa nga Kamza u shpreh se sot do të ndodhë goditja finale ndaj tiranisë së krimit. Basha deklaroi se sot tirania do të shkundet. “Nesër (sot) më 11 maj rinia dhe shqiptarët e lirë do të godasin tiraninë e krimit në pushtet.
Ne jemi të bindur se Shqipëria një ditë do të bëhet pa Edi Ramën kryeministër. Pa shkuar në burg ata që vodhën zgjedhjet, nuk ka hapje negociatash. Zgjedhje pa PD nuk ka dhe nuk ka për të pasur. Të gjithë të rinjtë më datë 11 maj, nesër (sot) do të jenë në sheshin Dëshmorët e Kombit. Rinia është me ne, kundër krimit, korrupsionit në vendin tonë. Sot rinia po ikën jashtë Shqipërisë për fat të keq si në vitin 1991.
Edhe unë ika më 1990, por erdha të bëjë këtu Shqipërinë europiane. Dhe Shqipëria europiane do të bëhet kur të ikë Rilindja e krimit. Më 11 maj të shkundim këtë qeveri kriminale. Kjo qeveri ka mbyllur bizneset, ka falimentuar fermerët, ka shkatërruar universitetet. Nesër (sot) luftoni për një Shqipëri europiane dhe këta kohë do të ketë përgjigje përfundimtare”, tha Basha./ Mimoza Ibra
