Partia Demokratike dhe Lëvizja Socialiste për Integrim pritet sot të tentojnë sërish destabilizimin e vendit. Në orën 18.30 militantët e këtyre dy forcave politike do të protestojnë para Kryeministrisë, në një protestë ku pritet të ketë tensione e përplasje me policinë. Kjo është protesta e katërt e madhe në vend dhe presioni ndaj liderit Lulzim Basha është rritur, pasi nëse rezulton flluskë sapuni, atëherë besimi se qeveria do bjerë do venitet. Për këtë arsye, zërat se mund të ketë tensione sot, janë shtuar ndjeshëm.
Por ajo që bie në sy është se opozita shqiptare nuk shkëputet dot nga ndikimi i Moskës. Edhe sot do të ketë një skenar të ngjashëm me opozitën serbe. Si për çudi, edhe sot në mbrëmje do të ketë një protestë në Beograd kundër qeverisë. Deri më tani flitej se ngjashmëria mes protestave në Tiranë dhe atyre në Beograd ka qenë rastësore.
Por nëse analizojmë faktet nuk ka më asnjë dyshim se kemi një skenar identik dhe dyshohet se pas protestave në Tiranë, Beograd, por dhe në Podgoricë, fshihet një dorë e vetme. Dyshimet bien mbi Rusinë.
Dje zyrtari i DASH, Matheë Palmer deklaroi se Moska po teton të krijojë paqëndrueshmëri në Ballkan dhe fakti që kemi protesta në disa vende, tregon qartë se kush është skenari i Moskës. Por protesta që do zhvillohet nesër në Beograd do jetë identike me atë në Tiranë. Protestuesit do mblidhen pranë sheshit “Terazijski” dhe më pas do të marshojnë para Presidencës, ku do të kërkohet dorëheqja e Aleksandër Vuçiç.
Vetë Byroja Diplomatik e SHBA ka bërë një njoftim, ku informon qytetarët e saj të qëndrojnë larg tubimit. Një njoftim i ngjashëm është bërë dhe për zhvillimet në Tiranë, ku nuk përjashtohen dhe skenarët e dhunës.
Ngjashmëritë
Nëse bëjmë një krahasim, kemi ngjashmëri të frikshme mes protestave në Tiranë dhe atyre në Beograd. Basha nisi protestën e parë më 16 shkurt, ndërsa më pas pati protesta “kombëtare” më 16 mars, 13 prill dhe tani më 11 maj. Në të katërta këto data ka pasur protestë në Beograd, në disa raste dhe në Podgoricë.
Po ashtu, PD e LSI protestonin çdo javë para Parlamentit, ndërsa tani protestojnë duke bllokuar rrugët. Edhe në Beograd ka pasur protesta spontane çdo javë. Po ashtu në të dyja protestat ka marshime protestuesish. Pra duket qartë se kemi një skenar të mirëmenduar rus, ku opozitat në Shqipëri, Beograd e Podgoricë duan të destabilizojnë Ballkanin.
Ndikimi rus
Gazeta ishte e para që e deklaroi se PD dhe LSI po ndjekin lojën e Rusisë për të futur në kaos vendin. Emra të rëndësishëm kanë akuzuar drejtpërdrejt ish-kryeministrin Berisha se ka lidhje me Moskën, ndërsa nuk mbetet pas dhe presidenti Ilir Meta. Emra si Spartak Ngjela dhe figura të tjera janë shprehur se si është krah serbëve dhe rusëve. Shumë zyrtarë të SHAB kanë thënë se çdo protestë dhe skenar destabilizues i shërben Rusisë.
Fakti që kemi protesta identike me ato serbe, ku dihet që atje fshihet Rusi, tregon qartë se dhe PD-LSI janë pas petkut rus. Kjo tregon se dyshja Meta-Berisha po bëjë gjithçka të për të çuar në zgrip vendin. Faktet tregojnë se Moska kohët e fundit ka rritur ndikimin saj në Ballkan, përfshirë dhe në vendin tonë.
Por reforma në drejtësi dhe djegia e mandateve i ka alarmuar të gjithë dhe tani janë gati të bëjnë gjithçka për të shpëtuar veten. Sot parashikohet sërish të ketë skenarë dhune edhe pse Basha është më i tërhequr, ndërsa Berisha e ka bërë të qartë se kjo është një betejë për jetë a vdekje. Mbete të shihet se çfarë do ndodhë, por e sigurt është që Rusia i ka sytë te ne nesër në mbrëmje./ Kliti Topalli
