Nga Alfred Peza
Faktorët kryesorë të jetës publike shqiptare dhe asaj ndërkombëtare, kanë dënuar dhunën e përdorur kundër policisë dhe institucioneve tona kushtetuese, në protestat e fundit të opozitës sonë jashtparlamentare.
Ata i kanë bërë thirrje me emër dhe mbiemër, Lulzim Bashës e Monika Kryemadhit, që të distancohen qartë e prerë dhe ta dënojnë atë. Madje, duke u kërkuar që të bashkëpunojnë edhe me drejtësinë, për të vënë përpara ligjit të gjithë autorët e saj.
I vetmi që nuk e ka bërë këtë deri më sot, është Presidenti i Republikës së Shqipërisë, Ilir Meta. Ai ka folur vetëm të shtunën. Por, as atë ditë dhe as deri më sot, asnjë fjalë nuk e ka thënë për këtë çështje. As deklaratat zyrtare nga SHBA, BE, PE, OSBE, Britania e Madhe, Gjermania, Italia, etj. nuk e kanë detyruar të paktën qoftë edhe formalisht, “sa me la gojën”, që ta thotë edhe ai publikisht.
Më poshtë po rendis katër mesazhet që Meta ka bërë publike, më 11 maj ditën e protestës së dhunshme të PD dhe LSI kur sulmuan me zjarr dhe bomba “Molotv” godinat e Kryeministrisë, Kryesisë dhe sallës së seancave plenare të Parlamentit, Drejtorisë së Policisë së Tiranës, etj.
Mesazhi 1:
Presidenti i Republikës, Ilir Meta është duke ndjekur me shumë shqetësim protestën e opozitës dhe u kërkon të gjithëve të ruajnë qetësinë, të evitojnë aktet e dhunës dhe konfrontimet, që mund të shkaktojnë lëndime në njerëz dhe dëme ndaj institucioneve….
Mesazhi 2:
Presidenti i Republikës, Ilir Meta u bën sërish thirrje qytetarëve të distancohen nga aktet e dhunshme dhe nga individët, të cilët rrezikojnë policët….
Mesazhi 3:
I bëj thirrje sërish të gjithë individëve që të distancohen nga aktet e dhunës dhe Policisë së Shtetit të ruajë qetësinë dhe të evitojë përdorimin e panevojshëm të dhunës ndaj protestuesve….
Mesazhi 4:
Situata para Drejtorisë së Policisë është absurde. Zoti Sahit Dollapi duhet të shoqërohet për në spital për të marrë ndihmën e parë për lëndimet dhe jo të mbahet në polici….
Siç shihet në këto mesazhe, asnjë fjalë nuk do të gjeni prej Kreut të Shtetit, drejtuar lidershipit të opozitës, Kryetarëve të PD e LSI, e pikërisht Lulzim Bashës e Monika Kryemadhit si organizatorët e protestës për tu distuancuar qartë dhe prerë kundër asaj që po ndodhte dhe për ta dënuar atë. Aq më tepër që ai la pare gjithçka kanë pare edhe tjerët, për aq kohë sa e pranon se po “ndiqte me shumë shqetësim protestën e opozitës”.
Thirrjet e tij i janë drejtuar për të ruajtur qetësinë, evitimin e akteve të dhunës dhe konfrontimeve, vetëm “qytetarëve” dhe “individëve”. Ashtu siç nuk ka që ti drejtohet posaçërisht edhe “Policisë së Shtetit (që) të ruajë qetësinë dhe të evitojë përdorimin e panevojshëm të dhunës ndaj protestuesve”. Apo që të bëjë deri edhe rolin e Doktorit, për rastin e Sahit Dollapit…
E si të mos mjaftonin këto, Presidenti i Republikës nuk ka thënë akoma asnjë fjalë, as për rastin e paprecedentë të parullës së shkruar në banesën e Ambasadorit të OSBE në Tiranë, nga një kandidate për deputete e LSI kur ai ishte Kryetar i saj, cila më shumë foto ka hedhur në rrjetet sociale me Ilir Metën sesa me prindërit e saj.
Kaq mjafton për të kuptuar se në anën e kujt është sot Presidenti I Republikës së Shqipërisë. Në mos në anën e dhunës dhe dhunuesve direkt të institucioneve, e sigurtë është se ai nuk e fsheh më se, ndodhet në anën e lidershipit të opozitës sonë jashtparlamentare. Duke u sjellë tashmë dhe duke vepruar, njësoj e pa asnjë dallim qëndrimesh, nga Lulzim Basha, Sali Berisha dhe Monika Kryemadhi. Të cilët, ashtu si edhe Ilir Meta, as nuk e kanë dënuar e as nuk janë distancuar nga dhuna!
