Rreziku rus për Shqipërinë dhe Ballkanin vijon të mbetet një shqetësim serioz për Shtetet e Bashkuara të Amerikës. Zyrtarë të lartë amerikanë e kanë ngritur shumë herë si shqetësim, por alarmin e dha sërish dje Atasheu i Mbrojtjes i ambasadës së SHBA, James Hilton.
Në Konferencën mbi Sigurinë në Ballkanin Perëndimor të mbajtur dje në Tiranë, Hilton e tregoi hapur rrezikun që i kanoset vendit tonë nga Irani dhe Rusia.
Sipas tij, iranianët kanë vënë në shënjestër Shqipërinë dhe vazhdojnë të planifikojnë veprime dashakeqe. Sa i takon Rusisë, James Hilton u shpreh se Moska është e vendosur për të krijuar përçarje. Për këtë arsye ai kërkoi që ky shqetësim të trajtohet me seriozitet dhe t’i përkushtohet vëmendja e duhur. “Megjithëse kemi arritur suksese të vazhdueshme në 28 vitet e fundit, puna jonë nuk ka përfunduar.
Irani vazhdon influencën dashakeqe dhe me veprimet e tij e dimë që ka shënjestruar dhe Shqipërinë. Ne mirëpresim mesazhin e qartë të Shqipërisë ndaj liderëve të Iranit, duke thënë se mbështetja e tyre ndaj terrorizmit nuk do të tolerohet. Ne të gjithë duhet të bashkohemi kundër sjelljes së papërgjegjshme të Iranit në Evropë dhe në botë. Liderët e Rusisë janë një tjetër sfidë e jashtme, teksa Kremlini duket i vendosur në komprometimin e institucioneve demokratike nëpër botë dhe për të mbjellë përçarje mes nesh.
Këto kërcënime nuk janë thjesht retorike dhe nuk duhen neglizhuar. Rusia ka përdorur sulme me agjent nervor dhe ka kryer aktivitete dashakeqe kibernetike. Ajo ka shkelur sovranitetin e Ukrainës dhe Gjeorgjisë duke pushtuar toka të njohura të tyre. Këto tip kërcënimesh janë kryer hapur pranë kufijve të NATO-s”, tha zyrtari i lartë amerikan.
Kjo deklaratë e tij tregon qartazi rrezikun që i kanoset Shqipërisë nga Rusia, por edhe faktin që amerikanët e kanë marrë seriozisht këtë çështje. Edhe pse ka shumë emra që mendojnë se Shqipërisë nuk i vjen rreziku nga Moska, ku një ndër ta është edhe Presidenti i Republikës, Ilir Meta, SHBA mendon krejt ndryshe dhe është e angazhuar që të mos lejojë zgjatjen e tentakulave ruse.
SHBA vlerëson reformën dhe ofron mbështetje
Atasheu i Mbrojtjes i ambasadës së SHBA, James Hilton në vijim të fjalës së tij dje ofroi mbështetje për Shqipërinë që të ruajë stabilitetin dhe të mos lejojë ndikimin e forcave të huaja. “Për të mbështetur dhe për të nxitur siguri më të gjerë brenda kufijve të Shqipërisë, Shtetet e Bashkuara do të vazhdojnë të promovojnë zhvillimin demokratik të Shqipërisë dhe të vazhdojnë të mbështesin përpjekjet për të luftuar krimin dhe korrupsionin.
Ne besojmë se aspiratat e Shqipërisë për në BE dhe reformat që ato sjellin do të çojnë në më shumë prosperitet dhe stabilitet për vendin dhe për rajonin në përgjithësi. Procesi i pranimit në BE do të forcojë aleancën midis Shqipërisë dhe Shteteve të Bashkuara”, deklaroi ai. James Hilton e ndali theksin edhe tek reforma në drejtësi. Sipas tij, Shqipëria po ecën në rrugën e duhur dhe po bën që të funksionojë shteti i së drejtës.
“Lajm i mirë është se Shqipëria po shkon në drejtimin e duhur, megjithëse përparimi duhet të vazhdojë. Për të krijuar një mjedis ekonomik që përfiton të gjithë, përparimi duhet të vazhdojë në sundimin e ligjit dhe çrrënjosjen e korrupsionit dhe krimit të organizuar. Reforma në drejtësi po ndodh, sepse shqiptarët meritojnë një sistem gjyqësor të sinqertë dhe transparent, ashtu si gjithë popujt e rajonit.
Shqipëria dhe pjesa tjetër e Ballkanit Perëndimor nuk qëndrojnë vetëm. Ata qëndrojnë krah për krah me njëri-tjetrin dhe me Shtetet e Bashkuara. Vetëm duke punuar së bashku mund të kapërcejmë kërcënimet e jashtme dhe të brendshme të sigurisë në rajon dhe të vazhdojmë marshimin transatlantik të palëkundur”, tha James Hilton.
Mimoza Ibra
