Partia Socialiste ka çelur dje fushatën për zgjedhjet vendore të 30 qershorit. Gjatë një aktiviteti të mbajtur në Parkun Olimpik të Tiranës, u prezantuan disa nga kandidatët e zgjedhjeve vendore. Ndërkohë që të pranishëm kanë qenë mijëra simpatizantë të PS, duke dhënë mbështetje për 61 përfaqësuesit e pushtetit vendor.
Në fjalën e tij, kryeministri Edi Rama e ka cilësuar opozitën si të paaftë dhe dembele, duke shtuar se sulmet e tyre vijnë nga frika e reformës në drejtësi. Sipas tij, Basha dhe Kryemadhi po shkojnë drejt vetëvrasjes politike, duke theksuar se synimi i tyre është të nxjerrin keq vendim me shpifje në mediat botërore.
“Ata kanë të drejtë që të bërtasin dhe ulërasin, të na shajnë dhe mallkojnë, por është e drejta e tyre për të sabotuar çeljen e negociatave, por ta harrojnë se kanë në dorë gjë tjetër përveçse të vetëvriten politikisht dhe të nxijnë faqen e tyre dhe Shqipërinë me gënjeshtrat dhe shpifjet skandaloze.
Ata kanë një problem, janë pak, ne jemi shumë. Ata janë dembelë dhe të paaftë për të drejtuar, ne jemi punëtorë”, tha Rama. Shefi i qeverisë deklaroi se 30 qershori do të jetë fundi politik i PD-LSI. “30 qershori do vendosi ikjen përfundimtare të politikës shqiptare përpara dhe lënies pas të fantazmave e hienave të së shkuarës, këtu do jemi dhe të gjithë do e shohin vetë se si pas 30 qershorit gjërat nuk do jenë më si më parë. Kush kujton se meqë nuk hyn në zgjedhje disa parti të falimentuara do shkatërrohet demokracia, gabon përkundrazi”, tha Rama.
Rama paralajmëron Berishën
Dje kryeministri Rama i ka dërguar një mesazh dhe Sali Berishës i cili ka kërcënuar se do djegë vendin. “Kjo nuk është fushatë pa kundërshtarë, por betejë me kundërshtarët e zgjedhjeve.
Një plak i marrë dhe i marrë fund që është mësuar që të luajë me zjarrin, që e ka djegur njëherë Shqipërinë, dhe erdhi në pushtet duke përfituar nga përçarja jonë dhe kujton se na bën shantazh me zjarrin e urrejtjes së tij dhe atë pinokun e vogël që ka në krye të partisë së tij. Ne nuk do të kërkojmë votën, por qytetarinë, përgjegjshmërinë kombëtare, përgjegjësia.
Kundërshtari kërkon njerëz lart e poshtë për një turp që do ta dëmtonte shumë rëndë Shqipërinë, që do ta bënte këtë vend skenë barbarie për të marrë peng zgjedhjet nga banditizmi. Do ta damkoste këtë vend në mbarë Europën. Mos guxojë kërkosh që të mendojnë një maskarallëk të tillë ndaj vendit, që nuk është i asnjë partie, por i të gjithë fëmijëve të Shqipërisë” se do ta merrni përgjigjjen që as nuk e keni menduar, tha kryeministri Rama.
Pengimi i zgjedhjeve
Po ashtu kryeministri Rama ka paralajmëruar partitë opozitare dhe militantët e tyre se kushdo që cenon procesin zgjedhor do të përballet me ligjin. “Rruga e vështirë që kemi zgjedhur, që askush nuk guxoi ti i imagjinonte është detyrimi unë ndaj fëmijëve.
Edhe këto zgjedhje që janë braktisur nga kundërshtarët tanë kryesorë politikë. Ata kanë frikë nga zgjedhjet prandaj bërtasin rrugëve dhe kërcënojnë. Kanë frikë nga ballafaqimi demokratik, dhe betohen se do të imponojnë një përplasje anti demokratike. Sot unë u them se zgjedhjet janë të çdokujt prej jush dhe kush e çon ndërmend tu pengojë duhet të mendojë dy herë para se ti bjerë me kokë gurit themelor.
Ata që vendosën që të dalin nga binarët e sistemit nuk mund të vendosin për asgjë më shumë përves njeri tjetrit. Zgjedhjet pa opozitën kryesore janë anti demokratike kur pengohet jo kur vendos që të mos hyjë vetë”, tha Rama. Shefi i qeverisë u shpreh se ata që do sulmojnë qendrat e votimit do të shpallen “non grata” në SHBA dhe BE, duke shtuar mes ironisë që të pyesin Berishën për këtë gjë, meqenëse edhe atij i është ndaluar hyrja në këto vende.
“Kush e merr qetësinë për tulatje dhe na kujton akoma këtë vend si sheshin e vjetër për përsheshin e një plaku të marrë dhe kush gënjehet nga vetëpërmbajtja jonë luan me zjarrin. Nuk duam të shohim asnjë pas hekurave për hesap të një plaku të marrë, prandaj do u dalim borxhit. Do u themi sa keq mund të përfundojë një individ që dënohet për krime zgjedhore, duke humbur lirinë e lëvizjes në SHBA bashkë me gjithë anëtarët e familjes së tij, kush nuk beson le të shkojë të pyes plakun (Berishën), po ashtu edhe të hyrjes në BE”, tha Rama.
Elisjeda Kiko
