Gjyqtari i Apelit Gjin Gjoni nuk do të jetë pjesë e trupës gjykuese të Kolegjit Zgjedhor që do të vendosë për futjen ose jo të komisionerëve të PD-LSI në KZAZ. Në mbledhjen e 29 majit Kolegji Zgjedhor hodhi shortin për paditë e opozitës dhe në padinë e LSI u zgjodhën si anëtarë Ridvan Hado, Artur Malaj, Tomor Skreli, Gjin Gjoni dhe Lindita Sinani.
Por futja e Gjin Gjonit në këtë listë ka shkaktuar debate, pasi ai ka marrë leje lindje. Në tetor 2018 Këshilli i Lartë i Drejtësisë i dha një vit leje për shkak të lindjes së bashkëshortes. Por edhe pse me leje lindje, Kolegji Zgjedhor e ka futur atë në short, pavarësisht se ka pasur kundërshti edhe nga vetë gjyqtari.
Për këto arsye, si Gjoni edhe Kolegji Zgjedhor i janë drejtuar Këshillit të Lartë Gjyqësor, duke rrëzuar pretendimet e Kolegjit Zgjedhor dhe u vendos që Gjin Gjoni të hiqet nga trupa gjyqësore.
Por me këtë vendim, Këshilli i Lartë Gjyqësor i ka dhënë një goditje të fortë Këshilli i Lartë i Drejtësisë, e cila nuk ishte e qartë në vendimin që ka marrë për Gjin Gjonin, duke anashkaluar fatin që ai është anëtar i Kolegjit Zgjedhor. Po ashtu është rrëzuar dhe Kolegji, i cili ka futur në short Gjonin, pavarësisht se ai nuk shkon më në gjykatë. Vendimi për largimin e Gjonit nga trupa gjykuese ka ardhur një ditë para se të jepet vendimi nëse opozita duhet të ketë ose jo komisionerë në KZAZ.
Vendimi për padinë e paraqitur nga PD do të jepet sot në orën 13:00, duke pasur si anëtarë për shqyrtimin e ankimit Lindita Sinanaj, Artur Malaj, Tomorr Skreli, Ridvan Hado dhe Astrit Kalaja. Po ashtu edhe për LSI vendimi do të merret sot në orën 14:00. Pas rrëzimit të kërkesës së opozitës nga KQZ, sot do të vendosin anëtarët e Kolegjit Zgjedhor nëse Partia Demokratike dhe Lëvizja Socialiste për Integrim do të kenë ose jo anëtarë në Komisioneve Zonave të Administrimit Zgjedhor në zgjedhjet vendore të 30 qershorit.
KQZ rrëzoi kërkesën e opozitës
Ndonëse PD-LSI pas bojkotit të Parlamentit vendosën të bojkotojnë edhe zgjedhjet vendore. Por dy partitë opozitare edhe pse nuk janë subjekt zgjedhor, kanë kërkuar që të kenë komisionerë në KZAZ me pretendimin se bëhen manipulime. Por kërkesa e tyre nuk është pranuar pak ditë më parë 4 anëtarët e KQZ nuk e kanë lejuar të ndodhë një gjë e tillë duke mos e miratuar vendimin për emërimin e komisionerëve.
Anëtarët socialiste në KQZ kanë argumentuar votën kundër, me arsyetimin se PD dhe LSI i kanë bojkotuar këto zgjedhje. “Nëse nuk je i regjistruar në zgjedhje nuk mund të kesh pjesë në administrimin dhe në menaxhimin e zgjedhjeve. Nuk mund të çosh komisionerë në strukturat e nivelit të dytë dhe të tretë.
Është shumë e qartë. Nuk e di pse u bë ky provokim”, tha nënkryetari i KQZ Denar Biba pak ditë më parë. Por fjalën e Denar Bibës e ka kundërshtuar kryetari i KQZ, Klement Zguri, i cili ishte i vetëm që dha votën pro për emërimin e komisionerëve të opozitës. Sipas Zgurit, kërkesa e PD-LSI për të emëruar komisionerët, edhe pse nuk janë subjekte zgjedhore janë brenda kornizave ligjore.
“Kolegët e mi fokusim më shumë moral, se sa ligjor. Pasi kemi kaluar gjithë këto hallka ligjore. Ligji thotë se anëtarët e emëruar qëndrojnë deri në emërimin e anëtarëve nga partitë politike, sipas këtij neni zëvendësimi duhet të bëhet jo më vonë se 30 ditë nga dita e zgjedhjeve. Nëse nuk janë parti politike, ti themi gjykatës të sjellë nëse këto janë parti politike apo jo.
Përveç një lloj mortaliteti nëse është apo jo qëllimi i duhur, i keq apo jo…le të ma thonë nëse kjo gjë ndalohet. Nëse ka një nen në ligj që ndalon kërkesën e partive. Partitë po zëvendësohen me qytetarë, si, ku? Ne po shkojmë një gjë më të avancuar. Po një qytetar kush do ta propozojë? Unë them se kërkesa është korrekte dhe duhet të pranohet”, u shpreh Zguri. /Elisjeda Kiko
