Procesi i vetingut ka spastruar sistemin e drejtësisë nga shumë gjyqtarë e prokurorë që janë kapur me probleme. Deri tani Komisioni i Pavarur i Kualifikimit ka shkarkuar nga detyra 54 funksionarë të sistemit, ndërsa pritet që numri të rritet më tej. Mes të shkarkuarve ka edhe shumë emra të njohur. Aty bëjnë pjesë anëtarët e Gjykatës Kushtetuese, ata të Gjykatës së Lartë, por edhe gjyqtarë e prokurorë të tjerë që kanë patur në dorë shumë dosje të bujshme.
Por kush i bëri pjesë të drejtësisë emrat e “famshëm” të shkarkuar? Nëse bëjmë një vëzhgim të të gjithë emrave të larguar gjatë kësaj periudhe nga komisioni i vetingut, bie në sy se pjesa më e madh e tyre i kanë gëzuar ato poste falë Sali Berishës dhe Ilir Metës. KPK ka dhënë vendimin e shkarkimit për të gjithë anëtarët e Gjykatës Kushtetuese, përveç Vitore Tushës.
Organi më i lartë në vend u shkërmoq nga vetingu, duke shënuar kështu edhe prishjen e shkallës së parë të piramidës së krijuar nga Sali Berisha dhe Meta. Ish-gjyqtarët e Gjykatës Kushtetuese, Fatmir Hoxha, Altina Xhoxhaj e Gani Dizdari janë bërë pjesë e sistemit në kohën kur në pushtet ishin Berisha-Meta. Lulo është emëruar në 2012 nga Këshilli i Lartë i Drejtësisë i drejtuar nga Bujar Nishani, Gani Dizdari në fund të mandatit të Berishës në 2013, ndërsa Fatmir Hoxha në 2011, në kohën kur ish-kryeministri ishte në pushtet.
Vetingu shkërmoqi edhe Gjykatë e Lartë. Edhe anëtarët e saj të shkarkuar i kanë gëzuar ato poste falë Sali Berishës. Ai ka përdorur KLD e drejtuar nga Nishani për të bërë pjesë të sistemit të drejtësisë Shkëlzen Selimin, Tom Ndrecën e Artan Brocin. Edhe ata u emëruan gjatë kohës kur Meta-Berisha ishin në koalicion
Emrat që shpëtuan ish-ministrat e PD dhe Metën
Midis të shkarkuarve nga Komisioni i Pavarur i Kualifikimit janë edhe gjyqtarët dhe prokurorët që kanë shpëtuar nga ndëshkimi shumë ish-ministra të PD. Shumë funksionarë të PD përfunduan në prokurori: Ridvan Bode, Lulzim Basha, Genc Ruli, Arben Imami, Fatmir Mediu, etj.. Por për asnjë prej tyre nuk janë marrë masa ndëshkimore, edhe pse akuzat për ta ishin tepër të rënda.
Mirëpo prokurorët e gjyqtarët që i mbajtën larg drejtësisë ish-ministrat e PD rezultojnë sot të shkarkuar nga vetingu. Një ndër ta është ish-gjyqtari i Gjykatës së Lartë, Shkëlzen Selimi, i cili ka patur në dorë dosjen e “Gërdecit” dhe të “21 Janarit”. Selimi është emëruar në Gjykatën e Lartë me vendim të KLD së Nishanit, ndërsa del se ka shpëtuar nga ndëshkimi Lulzim Bashën dhe Fatmir Mediun.
I shkarkuar nga vetingu është edhe prokurori i Tiranës, Adriatik Cama që ka qenë prokuror i dosjes “21 Janari” dhe është bërë pjesë e sistemit që në 1994 kur Berisha ishte president. Ndërkohë, ka edhe nga ata gjyqtarë që shpëtuan Metën nga burgu për shkak të aferës prej 700 mijë eurosh, por sot trupa është shpërbërë.
Trupa gjyqësore që gjykoi Metën përbëhej nga: Ardian Dvorani, Gani Dizdari, Majlinda Andrea, Arjana Fullani dhe Guxim Zenelaj. Katër emrat e fundit dolën të gjithë në mbështetje të Ilir Metës, duke dhënë votën për pafajësi, ndërsa Ardian Dvorani doli me mendim paralel, duke kontestuar vendimin në disa pika.
Dvorani sot është kryetar i Këshillit të Emërimeve në Drejtësi dhe është i vetmi që doli nga linja në rastin e Metës. Por 4 emrat e tjerë e gjejnë sot veten jashtë sistemit të drejtësisë. Gani Dizdari ngeli në veting, Majlinda Andrea u dënua me 4 vite burgim për korrupsion, por që u konvertua në shërbim prove.
Ndërkohë, ditët e fundit dy emrat e mbetur (Arjana Fullani dhe Guxim Zenelaj), kanë vendosur të tërhiqen përfundimisht nga funksioni, duke mos pranuar të futen në veting. E gjitha kjo tregon sesi Berisha-Meta kishin kapur drejtësinë dhe përmes saj shpëtuan veten dhe vartës të tyre nga ndëshkimi. Por KPK iu shkatërroi piramidën e ngritur nga ata./ Mimoza Ibra
/Agjensia e Lajmeve Sot News/
