Nga Ilir Mborja
Për nismën e socialistëve në Kuvend për një mocion me debat mbi procedurat për shkarkimin e Presidentit të Republikës Ilir Meta (për shfuqizimin e 30 qershorit si datë të zgjedhjeve vendore) që zhvilloi Kuvendi, modestish mendimin tim e shpreha në shkrimin “Problemet e shëndetit mendor zgjidhen vetëm me metoda mjekësore”.
U mundova të shprehja mendimin tim modest se arsyeja e pretenduar nga socialistët (për shkelje flagrante të Kushtetutës nga ana e Presidentit duke çdekretuar datën e zgjedhjeve vendore të 30 qershorit) në këtë moment nuk është as bindëse, as racionale, madje as e ndershme…
Pra, duke pasur parasysh se kemi të bëjmë me probleme të shëndetit mendor të presidentit Ilir Meta, nënvizova se zgjidhja duhet kërkuar VETËM me metoda mjekësore.
Gjithashtu, për të mos qenë deri në fund denigrues me zotin Meta, u rezervova të paraqisja të gjitha rastet kur ai ka shfaqur publikisht shenjat klinike të një të sëmuri mendor që, veç mjekimit, mund të ketë nevojë për izolim…
Për të dalë në konkluzionin tim, se Ilir Meta e kishte rezauruar me kohë arsyen e shkarkimit nga posti i lartë për arsye të shfaqjes së problemeve me shëndetin mendor (dhe prandaj me të duhen përdorur vetëm me metoda mjekësore) e pashë të udhës të mjaftohesha me dy tre shembuj…
Gjithmonë duke iu drejtuar socialistëve, u përmenda atyre rastet kur Ilir Meta, në cilësinë e Presidentit të zgjedhur të Republikës, bëri thirrjet e çartura mendërisht: “Shqiptarë armatosuni!” (17/06/2017) dhe “Në mos kini armë gjeni, ja rrëmbeni atij qeni!” (TV Klan – 19/06/2017) dhe ata (socialistët) nuk reaguan.
Tek kjo e dyta (“Në mos kini armë gjeni, ja rrëmbeni atij qeni!”) përveçse kemi të bëjmë me një thirrje antikushtetuese për armatosje të popullit, duke quajtur “qen”(?!) shtetin, mu si një pacient me çrregullime neurotike të rënda, Ilir Meta harroi atëherë se, kryetar i shtetit që ai cilëson “qen”, ishte ai vetë…
Presidenti Ilir Meta ka shfaqur publikisht çrregullime psiqike (aluçinacione deliranti e neurozë depresive bashkë) kur para kamerave nga Pogradeci u kanosej amerikanëve: “Jam i gatshëm të vetëflijohem si Allende…” (20/04/2019) Bash për këto, debati i socialistëve për nisjen e procedurave të shkarkimit të Presidentit, për arsyen të cilën mbase me të drejtë ata e pretendojnë, mua më tingëllon iracional dhe i pandershëm…
Gjithashtu, gjithmonë duke shprehur mendimin tim si zgjedhës, shpreha mendimin se nuk do të më vinte mirë që ky president të shkarkohej për një çështje kaq të diskutueshme siç është dekreti i çdekretimit të datës së zgjedhjeve të 30 qershorit. SPAK-u po krijohet dhe nxitimi për t’i dhënë këtë favor (duke e shkarkuar për kaq gjë) më duket i dyshimtë.
Për këtë u sugjerova socialistëve, që nëse duan ta ndihmojnë vërtetë Ilir Metën, drejtimi për tek mjekët psikiatër dhe këshillimi nga ana e tyre (këtu mendja më shkoi tek miku ynë i përbashkët Pandeli Majko) që ai të jetë bashkëpunues me ta… Ky do të ishte sipas meje favori më i mirë që e justifikon Ilir Metën nga gjithçka antikushtetuese që ka konsumuar.
Edhe po të jetë një kleptoman, siç përflitet nga shumëkush, drejtimi për tek mjekët psikiatër mendoj se është rruga e vetme, më e drejtë dhe më humane për Ilir Metën…
Kjo ishte përmbledhtas ajo që u thosha të zgjedhurve të mi socialistë dje dhe, me vetëdije të plotë, nuk përmenda rastin kur, në delir të skajshëm madhështie, ai, Ilir Meta ynë, i drejtoi me gisht, amerikanë e perëndimorë bashkë, për në Korenë e Veriut (11/ 06/ 2019).
Xhestet i tij me gishtin tregues, tundjen e Kushtetutës apo simbolin e shqiponjës që bëri me duar në atë rast, çdo mjek psikiatër do ta kishte të vështirë ta ndante se kujt ia adresonte: DASH-it, Brukselit, Berlinit, OSBE-së apo Koresë së Veriut?..
Por mjekët psikiatër me siguri thonë vetëm një gjë: Deliri i madhështisë është shenjë e qartë që i paraprin skizofrenisë.
Të gjitha këto çrregullime mendore të shfaqura publikisht nga Ilir Meta duket se janë shkaktuar nga fobia (frika) që i shkakton afërsia me objektin SPAK. Ndërsa deklarata më e fundit e tij (14/ 06/ 2016) se: “Presidenti nuk ndalon askënd të çmendet.
Përkundrazi, i fton të gjithë që të izolojmë çdo të çmendur…” më bën të korrigjoj titullin e shkrimit “Problemet e shëndetit mendor zgjidhen vetëm me metoda mjekësore” e të shtoj se, në rastet kur paraqesin rrezik, ata duhen izoluar. Sidomos kur janë në poste të larta si ai i pacientit për të cilin po flasim, rreziku është i jashtëzakonshëm.
