Avokati i familjes Berisha dhe i Fazlliçit Genc Gjokutaj gjatë diskutimit të shtimit të rojeve të vendosura për ruajtjen e kryetarit të opozitës, Lulzim Basha, pas denoncimit për kërcënim, ka habitur pasi është shprehur se ai është në “arrest ambiental”. Sipas tij shtimi i rojeve është për të marrë informacion, është një arrest ambiental.
“Ministri i Brendshëm duhet të vërë në dijeni Presidentin, Shefin e Shërbimeve, komandantin e Gardës. Të ecë në linjë zyrtare nëse vërtetë kryetari i opozitës është në rrezik fizik për jetën. Pasi thirrja e një badigardi të cilit i thuhet “do komunikojmë verbalisht dhe jo shkresërisht” është një metodë që tregon degradim të institucioneve, shpërfillje të institucionit nga ana e ministrit të Brendshëm, garantit të jetës.
Kjo duhet dënuar me forcë, duhet mbajtur qëndrim ligjor. Në fakt për mua kjo është një histori si të gjitha të tjera, hyn tek skenari dhe pjesa e marrëzisë së një pushteti që nuk po mban mend se çfarë po bën. Kjo është një marrëzi. Por duhet të dini që shtimi i rojes kreut të opozitës nuk është për çështje sigurie. Ka një praktikë në të gjitha vendet jo demokratike.
Shtimi i rojeve është për të marrë informacion. Është një arrest ambiental. Ti dukesh sikur je i lirë por në fakt je në arrest. Nëse kjo ka ndodhur kjo nuk ka lidhje me sigurinë. Dëshiroj të mos ketë ndodhur”, u shpreh avokati.
