Kjo javë pritet të jetë vendimtare për 22 prokurorët që garojnë për t’u bërë anëtarë të Strukturës së Posaçme Antikorrupsion. Që prej të hënës, Këshilli i Lartë i Prokurorisë po zhvillon fazën e intervistave me ta, fazë e cila do të jetë decizive në përcaktimin e fatit të kandidatëve. Ditën e djeshme u përballën me anëtarët e KLP, por jo vetëm, 3 kandidatë të tjerë.
Bëhet fjalë për kryetaren e Prokurorisë së Krimeve të Rënda, Donika Prela si edhe për prokurorët Besim Hajdarmataj, Besnik Muçi dhe Doloreza Musabelliu. Në mbledhjen me dyer të mbyllura mësohet se të katër këta garues janë “skanuar” si nga KLP, ashtu edhe nga monitoruesit ndërkombëtarë. Këta të fundit duket se kanë marrë situatën nën kontroll. Ishte Mishel Lakomy e misionit Opdat ajo e cila ka bombarduar me pyetje prokurorët që kërkojnë të marrin në dorë frenat e luftës antikorrupsion. Vëmendja kryesore e monitoruesve ndërkombëtarë ka qenë tek hetimi i dosjeve të bujshme dhe për këtë pikë nuk kanë kaluar pa u “filtruar” Donika Prela dhe Besim Hajdarmataj. Sipas burimeve të gazetës, ky i fundit është pyetur nga ekspertët e Euralius dhe Opdtat për dosjen “339” dhe nxjerrjen e sekretit hetimor. Ndërkombëtarët kanë kërkuar të dinë nga Hajdarmataj sesi ka vepruar me dosjen “339”, pse zbardhja e përgjimeve u vonua aq shumë dhe pse ato përfunduan në duart e opozitës. Në përgjigje, Besim Hajdarmataj hoqi përgjegjësitë nga vetja dhe mohoi t’ia ketë dhënë materialet PD. Marrjes në pyetje nga ndërkombëtarët për çështjet e nxehta nuk i shpëtoi as Donika Prela. Ajo është pyetur për dosjen “Shullazi”, ndërsa mësohet të ketë thënë se ka bërë lëvizjet e duhura edhe pse kjo shkaktoi konflikt të brendshëm në Prokurorinë e Krimeve të Rënda. Edhe për dosjen “339” Prela dha llogari para ndërkombëtarëve, ndërsa u pyet edhe për problemet që ONM ka konstatuar me pasurinë e saj në kuadër të procesit të vetingut.
Roli i ndërkombëtarëve
Edhe për prokurorët Besnik Muçi e Doloreza Musabelliu përfaqësuesit e SHBA-BE kanë bërë pyetje shpotitëse. “A jeni kërcënuar ndonjëherë dhe si keni reaguar? A keni patur presion nga shefi juaj? Sa gjuhë të huaja flisni?”, këto mësohet të kenë qenë disa nga pyetjet e tjera që ndërkombëtarët kanë drejtuar për kandidatët e SPAK. Kjo do të thotë se përfaqësuesit ndërkombëtarë kanë marrë në dorë ngritjen e Strukturës së Posaçme Antikorrupsion dhe po i përzgjedhin me shumë kujdes anëtarët që do të luftojnë korrupsionin në nivele të larta. Në rregulloren që Këshilli i Lartë i Prokurorisë ka hartuar për konstituimin e SPAK është e përcaktuar qartë se faktori ndërkombëtar do të ketë rol aktiv në intervistimin e kandidatëve. “Përfaqësues të misioneve EURALIUS dhe OPDAT mund të jenë pjesëmarrës në procesin e intervistave dhe faza të tjera të vlerësimit të kandidatëve. Monitoruesit ndërkombëtarë mund të drejtojnë pyetje gjatë intervistave, pasi të kenë përfunduar anëtarët e Këshillit”, thuhet në rregullore. Duke qenë se kjo është një fazë shumë e rëndësishme sepse në të dalin në pah aftësitë e prokurorëve për të hetuar dosjet e korrupsionit, ndërkombëtarët janë vënë vetë në lëvizje. Ata nuk do të lejojnë asnjë emërim pa meritë në SPAK, njësoj siç nuk lejojnë tek Komisioni i Pavarur i Kualifikimit asnjë vendim të dyshimtë. Duke qenë se procesin e përzgjedhjes së anëtarëve të SPAK e kanë marrë në dorë ndërkombëtarët, kjo strukturë pritet të jetë gati shumë shpejt. Ngritja e saj është çështje ditësh. /Mimoza IBRA
