Drejtori i përgjithshëm i Shërbimeve të Transportit Rrugor, Arben Isaraj, gjatë analizës vjetore të institucionet që ai drejton, pralajmëroi një reformë të thellë në shërbimet që ofrohen nga drejtoritë e transportit rrugor.
Kështu, parashikohet trajnimi dhe certifikimi i punonjësve si në nivel qendror ashtu dhe rajonal si dhe rritja e investimeve në infrastrukturë. Gjithashtu, parashikohet lehtësimi i procedurave për realizimin sa më shpejt të shërbimeve që ofron institucioni si dhe përmirësimin dhe ndryshimin e kuadrit ligjor, aty ku ka mangësi apo është e nevojshme , shkruan “Sot”.
Nga ana tjetër, do të jetë e nevojshme përgatitja e një baze teorike bashkëkohore në bashkëpunim me si-motrat e saj në Europë. Theksi u vu edhe te rëndësia e përgatitjes teoriko-praktike me profesionalizëm e kandidatëve për pajisje leje drejtimi kombëtare, mënyrë kjo që do rrisë aftësinë e tyre në drejtimin e mjetit në rrugë duke lehtësuar trafikun urban dhe uljen e rrezikut për aksident.
“Isaraj theksoi rëndësinë e reformimit total të institucionit që ai drejton si në nivel qendror ashtu dhe rajonal. Për këtë, ai kërkoi bashkëpunim të vazhdueshëm ndërmjet drejtorive e sektorëve. Në kuadër të këtij reformimi, Isaraj përshkroi mënyrat për arritjen e tyre si: Trajnimi e certifikimi i punonjësve si në nivel qendror ashtu dhe rajonal. Investime në infrastrukturë e logjistikë; Lehtësimi i procedurave për realizimin sa më shpejt të shërbimeve që ofron institucioni; Përmirësimi dhe ndryshimi i kuadrit ligjor, aty ku ka mangësi apo është e nevojshme; Përgatitja e një baze teorike bashkëkohore në bashkëpunim me si-motrat e saj në Europë. Aplikimi i këtyre mënyrave sa më shpejt dhe si duhet, vazhdoi Isaraj, do jetë baza e realizimit të objektivit kryesor dhe sfidës për përmirësimin e shërbimit ndaj qytetarëve,kohës dhe profesionalizmin në ofrimin e tij. Në përfundim, Isaraj, theksoi rëndësinë e madhe që ka përgatitja teoriko-praktike me profesionalizëm e kandidatëve për pajisje me leje drejtimi kombëtare, mënyrë kjo që do rrisë aftësinë e tyre në drejtimin e mjetit në rrugë duke lehtësuar trafikun urban dhe uljen e rrezikut për aksident”, thuhet në njoftimin për shtyp të Drejtorisë së Përgjithshme të Shërbimeve të Transportit Rrugor.
Patentat e reja
Në fillim të këtij viti, kanë hyrë në fuqi patentat e reja, ku janë shtuar 7 kategori të reja të lejeve të drejtimit. Me hyrjen në fuqi të udhëzimit të ri nga 1 janari janë shtuar kategoritë e lejeve të drejtimit, nga 8 kategori leje drejtimi që ishin më parë janë bërë 15 kategori leje drejtimi. Kategoritë shtesë të lejeve të drejtimit janë nënkategori të kategorive bazë. Ndërkohë, mosha për vlefshmërinë e patentës është rritur. Për kategoritë A, B dhe BE, patenta ishte e vlefshme 5 vjet kur merrej në moshën mbi 50 vjeç deri në 60 vjeç. Tani ky afat vlefshmërie është deri në moshën 70 vjeç. Po ashtu, gjatë këtij viti janë bërë edhe disa ndryshime në testim, ku numri i lejuar të gabimeve është 4 nga 7 që ishte më parë.
