Opozita është mbërthyer nga përplasje e divergjenca të forta javët e fundit. Hyrja në lojë e Ilir Metës duket se e ka theluar përçarjen mes PD dhe LSI, pasi presidenti po tenton të duket më opozitar se Basha. Meta priste që përmes shtyrjes së zgjedhjeve të gjente mbështetjen e Bashës, por nuk ndodhi kështu. Refuzimi i 13 tetorit nga ana e PD e ka kapur në befasi presidentin, të cilit rrezikon t’i bjerë i gjithë plani. Por për çfarë plani bëhet fjalë?
Meta dhe Berisha po punojnë shumë fort në prapavijë që në shtator të rikthen protestat e dhunshme nëpër rrugët e Tiranës. Por teksa deri në qershor si alibi ishte 30 qershori, tani ka rënë gjithçka. Por presidenti po mundohet të ngrejë një tjetër alibi, 13 tetorin. Afatet për regjistrimin e partive në zgjedhje kanë përfunduar dhe po ashtu nuk ka asnjë mundësi që të ketë zgjedhje në tetor. Por Meta këmbëngul te 13 tetori. Arsyeja është se presidenti po kërkon që13 tetori të përdoret si alibi në vjeshtë për të protestuar kundër qeverisë. Basha ka deklaruar se do ketë protesta, por nuk dihet e për çfarë do protestohet tani. Ndërkohë që për Metën 13 tetori është një alibi e fortë dhe prandaj këmbëngul që Basha ta mbështesë. Pas statuseve në rrjetet sociale, Meta ka hedhur në sulm dhe mediat pranë tij. Disa prej tyre ditët e fundit janë shprehur hapur se në shtator-tetor Basha duhet ta rrëzojë qeverinë. Sipas tyre, tani nuk ka më asnjë justifikim për të vijuar me protesta të qeta. Pra presidenti po synon tym e kaos në shtator. Por sharra duket se i ka ngecur në gozhdë presidentit, pasi PD deri më tani nuk po i përgjigjet. Basha lufton për zgjedhje të lira dhe të drejta. Ndërsa presidenti duket se ka hall tjetër. Halli i tij është shkrirja e partisë. Meta e di se me braktisjen e zgjedhjeve LSI doli më e humbura. Ai pak elektorat që kishte në bashki po kalon me PS dhe nëse vijohet me këto ritme, për disa muaj nuk do ketë më LSI. Prandaj presidenti këmbëngul te 13 tetori. Një burim në PD i tha gazetës se presionet ndaj Bashës janë shtuar ndjeshëm. Si Berisha, ashtu dhe Meta po kërkojnë me ngulm që PD të pranojë 13 tetorin dhe kjo mund të përdoret për të protestuar në shtator, duke shkuar deri te rrëzimi i qeverisë.
Tentativat e Metës dhe Berishës për dhunë: Nëse kthehemi te protestat e pranverës, Berisha ishte i vetmi që kërkonte kaos dhe dhunë. Po ashtu, në mbështetje të tij dilte dhe Monika Kryemadhi. Mosbindja civile ishte kthyer në shprehje të përditshme për ta. Por ndërhyrja e ndërkombëtarëve bëri që të ketë zgjedhje dhe të mos ketë tym e kaos. Por pas 30 qershorit situata në raport me ndërkombëtarët ka ndryshuar te LSI. Meta ka nisur një lutë të fortë me SHBA dhe pas tij është rreshtuar dhe LSI. Pra deri më 30 qershor, SHBA e BE e stepën Vasilin, Kryemadhin dhe ata që i ndiqnin pas. Por frika është se në shtator LSI mund të mos u bindet ndërkombëtarëve, kjo pasi frenat e partisë i ka marrë Meta. Kryemadhi ka javë të tëra që nuk reagon, ndërsa ai që flet si kryetar partie është Meta. E sigurt është që në shtator do rikthehen protestat, por mbetet të shihet nëse do kemi tym e flakë. Meta e Berisha kanë nisur që tani të mprehin shpatat, duke i vënë kusht Bashës rrëzimin e qeverisë brenda tetorit. Por mbetet të shihet nëse lideri demokrat do i rezistojë presionit. /Kliti Topalli
