Ish-ambasadori i Kosovës në Mal të Zi, Xhafer Ahmeti, ishte shkarkuar nga posit, për shkak të fyerjeve që kishte bërë ndaj Sali Berishës, atë kohë kryeministër i Shqipërisë, shkruan gazeta Metro.
Në historinë e funksionimit të institucioneve të diplomacisë kosovare, janë regjistruar raste kur ambasador të Republikës së Kosovës, janë shkarkuar nga pozita e tyre pë shkak të gjuhës së përdorur.
Kështu i kishte ndodhur ish-ambasadorit të Kosovës në Mal të Zi, Xhafer Ahmeti.
Ai në vitin 2014 ishte shkarkuar nga pozita e ambasadorit për shkak të fyerjeve që kishte bërë ndaj Sali Berishës në rrjetin social Facebook.
Ahmeti kishte komentuar për Berishën që “nuk është normal” dhe që është “psikopat”. Menjëherë pas komenteve, ish-ministri i Punëve të Jashtme, Enver Hoxhaj e kishte tërhequr Ahmetin nga kjo pozitë, duke thënë që nuk janë në pajtim me rregullat e diplomacisë, as me sjelljen e diplomatit.
Për gjuhën që kishte përdorur në Facebook, ishte shkarkuar edhe diplomati Hamdi Reçica.
Reçica ishte shprehur i pakënaqur me transferimin e tij nga Konusllata e Munihut, në atë të Hamburgut. Atëbotë ministrja e Jashtme, Meliza Haradinaj vendimin për transferimin e kishte marrë pa ia kërkuar tri alternativa ku donte të transferohej.
Këtë pakënaqësi, Reçica e kishte shprehur në profilin e tij në Facebook, ku kishte shkruar se në diplomacinë e Kosovës për momentin është duke u bërë një prostitucion diplomatik.
Pas këtyre komenteve, atij i ishte dërguar vnedimin për kthim të menjëhershëm nga misioni për shkelje të rregullave të shërbimit të jashtëm të Republikës së Kosovës, dhe çështjen e tij do ta trajtojë Komisioni për Grada dhe Disiplinë, konform ligjit dhe rregulloreve në fuqi.
Por çfarë do të ndodh me rastin e zyrtarit të kësaj ministrie që shërben në Ambasadën e Kosovës në Shkup, Prindon Sadriu, e i cili në vazhdimësi fyen mediat dhe gazetarët. A do të merren masa ndaj Zotëriut të Parë, tashmë kur ky dikaster udhëhiqet nga Donika Gërvalla e Listës GUXO?
Sadriu hiq më larg se të mërkurën në mbrëmje, i ka quajtur gazetarët si “ndërmarrje e përbashkët kriminale”, pas raportimeve në media për shpenzimet për udhëtime që Vjosa Osmani kishte bërë gjatë kohës sa kishte qenë deputete në Kuvendin e Kosovës.
Por ky nuk ka qenë rasti i vetëm kur Sadriu ka përdorur gjuhë të tillë ndaj gazetarëve.
Në një qarkore që mban datën 20 gusht të vitit 2020 e që është lëshuar nga Arben Rugova, si zëvendësues i Drejtorit të Divizionit për Komunikim Publik, e që vlente vetëm për udhëheqësit e Misioneve Diplomatike të Shërbimit të Jashtëm, specifikohen shumë qartë se si duhet përdorur rrjetet sociale.
Aty udhëzohen punonjësit e shërbimit të jashtëm që të kursehen nga shprehja e mendimeve private, pasi që nuk ka rëndësi se cili është qëllimi i punonjësit por se si një qëndrim i tillë interpretohet nga publiku.
“Çdo deklaratë, prononcim ose “postim” në mediumet sociale, të cilën e bën një pjesëtar i Shërbimit të Jashtëm ose person tjetër që kryen ndonjë detyrë ose funksion për Shërbimin e Jashtëm, mund të interpretohet nga publiku si qëndrim zyrtar i Ministrisë së Punëve të Jashtme dhe Diasporës ose të paktën t’i atribuohet Ministrisë si i tillë. Nuk është me rëndësi se çfarë qëllimi ndjek punonjësi i Shërbimit të Jashtëm kur e bën një “postim”, por, se si interpretohet dhe perceptohet ky “postim nga publiku.
Kjo vlen edhe për të gjitha rastet kur ndonjë deklaratë, prononcim ose “postim” privat shënohet si “mendim personal”, por, ka të bëjë drejtpërdrejtë me çështje që janë në kuadër të fushëveprimit të Ministrisë së Punëve të Jashtme dhe Diasporës, Shërbimin e Jashtëm ose në përgjithësi me politiken e jashtme të Republikës së Kosovës”, thuhet në këtë qarkore.
Pika shtatë e kësaj qarkoreje të MPJ-së, thekson se mos zbatimi i rregullave të vendosur anë qarkore, konsiderohet si shkelje disiplinore.
“Përndryshe, mos zbatimi i rregullave të përcaktuara me këtë qarkore do të konsiderohen si shkelje disiplinore dhe do të procedohen menjëherë si të tilla. Për personat e përcaktuar në pikën 2 të kësaj qarkore, të cilët nuk janë pjesëtar të Shërbimit të Jashtëm në cilësinë e shërbyesve civil, mos zbatimi i rregullave sipas kësaj qarkore do të konsiderohet si shkelje esenciale e kontratës dhe do të merret si shkak për shkëputjen e menjëhershme të angazhimit me Ministrinë e Punëve të Jashtme dhe Diasporës”, thuhet në pikën shtatë të qarkores.(Metro)
