Skenarët destabilizues të ish-kryeministrit Sali Berisha kanë ngjallur shumë dyshime në arenën politike shqiptare. Prej kohësh është folur se ai mund të ketë lidhje me influencat ruse, por i vetmi që ka bërë një akuzë të drejtpërdrejtë ka qenë deputeti Kreshnik Çollaku.
Në mbledhjen e Kryesisë të mbajtur pak ditë më parë ai ka deklaruar prerë se pas këtyre skenarëve destabilizues fshihen agjenturat ruse.
“Këto janë inteligjencat ruse me kishën ortodokse. Influencat e kundërshtarëve të Amerikës. Ata që i sollën te dyert e godinës ishin miqtë tanë të një jete, si mund ta lejonin ata këtë dhe aq më tepër si mund ta lejojnë sot pa u distancuar prej saj. Atë ditë, Zoti e bëri që në godinë të mos kishte viktima. Dhuna për mua është një kufi ndarës me këdo.
Ndaj, unë mendoj me këdo që nxiti apo përdori dhunë ndaj nesh, kolegeve e ish-miqve të tyre, nuk ka çfarë na mban më bashkë. Në këtë parti dhunuesit dhe të dhunuarit nuk mund të rrinë më bashke”, ka thënë Çollaku. Por a ka pasur Berisha lidhje me rusët?
Gjatë kohës që ai ishte në qeveri ka pasur marrëdhënie shumë të mira Shqipëri-Rusi. Përveç arritjes së marrëveshjeve, ka pasur dhe një vizitë të zv/ministres së Jashtme të asaj kohe Edit’h Harxhi, sot mbështetëse e ish-kryeministrit. Ka qenë gazetari Thanas Mustaqi i cili ka hedhur dritë për vizitën e vitit 2012.
Gazetari Mustaqi, shkruan në rrjetet sociale se sipas njoftimit për shtyp të MPJ-së ruse në atë kohë, në konsultimet midis Titovit dhe Harxhit, më 4 prill, “u diskutuan çështje të ndërveprimit të dy vendeve në organizatat ndërkombëtare, veçanërisht në kontekst të kryesimit të ardhshëm të Shqipërisë në Këshillin e Evropës, një numër çështjesh të politikës globale dhe gjendja në Evropën Juglindore”.
Më 3 prill, në universitetin e Ministrisë së Punëve të Jashtme të Federatës Ruse MGIMO, ajo mbajti në një leksion kushtuar zhvillimit të marrëdhënieve miqësore midis Rusisë dhe Shqipërisë, ku tregoi me hollësi mbi bazat e bashkëpunimit, që u vendosën në marrëdhëniet mes dy vendeve në vitet 1940-1950. Interesant është fakti se Ministria e Jashtme e jona e ka mbajtur të pa pasqyruar këtë vizitë.
Vizita e Lavrov
Harxhi në atë kohë ka dhënë dhe një intervistë për mediat ruse. Ajo ka treguar se si u ra dakord që ministri i Jashtëm i asaj kohe Sergei Lavrov të vinte në Tiranë, ndërsa ishte përgatitur dhe terreni për vizitën e Berishës në Rusi. “Kemi përgatitur tashmë ftesën për Sergej Lavrovin [ministër i Punëve të Jashtme i Federatës Ruse] për të vizituar Tiranën.
Ministri ynë i Punëve të Jashtme [Edmond Haxhinasto] ka shprehur dëshirën për të ardhur në Moskë. Do të donim të përfshinim të gjitha nivelet në zhvillimin e marrëdhënieve ruse-shqiptare. Vizitat dypalëshe mund të shpeshtohen dhe në një nivel më të lartë, duke pasur parasysh dhe fushën ekonomike.
Presim që kryeministri ynë [Sali Berisha] të jetë i pranishëm në forumin ekonomik të Shën-Peterburgut në muajin qershor [2012], në të cilin mund bëhen bisedime me homologun rus për çështje konkrete ekonomike”, ka deklaruar ajo në intervistë, shkruan gazetari. Pra duket se fjalët për mbështetjen ruse ndaj Berishës nuk janë dhe aq të pabaza.
