Rriten dyshimet se pas skemës së mashtrimeve në Fondin Besa fshihen njerëz më të pushtetshëm se ata që janë arrestuar. 7 punonjëse të një filiali përfunduan në pranga, pasi përmes një skeme mashtrimi përfituan 3.7 milionë euro. Disa u liruan nga Gjykata e Shkallës së Parë, ndërsa disa të tjerë janë liruar dje në Apel. Dje u mbajt seanca në Gjykatën e Apelit Tiranë, ku Albana Imami, drejtoresha e filialit të fondit mbeti në burg.
Gjykata e Apelit refuzoi kërkesën e Imamit për ta liruar, ndërsa nga arrest me burg masa u kthye në arrest shtëpie për dy vartëset e Imamit, Esmaralda Vaso dhe Bertina Kananin. Ndërkohë, me kërkesën që ta lejonin të kthehej tek fëmijët njëra nga të dyshuarat për skemë mashtruese dhe piramidale hodhi akuza për çështjen e Fondit “Besa”. “Të gjithë ata që vodhën janë jashtë”, tha mes lotëve Orkida Driza, e cila edhe pse u tregua e gatshme të tregonte emrat e mashtruesve, ajo u la nën masën arrest me burg. Pas pikëpyetjeve që ngritën vetë të akuzuarit që këmbëngulin se janë mashtruar, ishte radha e familjarëve që shpërthyen në hyrje të gjykatës. Pra nga 6 të arrestuar, vetëm 3 janë në paraburgim. Por deklarata e Orkida Drizës ka ngjallur dyshime. Ajo ka deklaruar se ata që kanë qenë të përfshirë në këtë skemë mashtrimi janë jashtë dhe ata që po hetohen dhe mbahen në qeli janë të fundit e zinxhirit. Pyetja që shtrohet është: A ka emra të rëndësishëm të përfshirë në këtë skemë? A ka zyrtarë të lartë të Fondit Besa dhe të afërm politikanësh që janë bërë pjesë e lojës? I takon prokurorisë të tregojë, por duket qartë se nuk mund të vidhen 3.7 milionë euro pa një dorë të fortë. Në reagimin që policia dhe prokuroria dërguan për mediat kur plasi skandali, u kujdesën të specifikonin se nuk ka zyrtarë të lartë, por gazeta ka treguar se si Fondi Besa ka mbështetje të fortë politike. Që kur u themelua e deri më tani është mbështetur nga të gjitha qeveritë.
Krijimi i Fondit Besa
Në fillim të vitit 1999 George Soros krijoi Fondacionin Besa, i cili do të operonte si një entitet juridik që vepron si organizatorë joqeveritare, jo politike dhe jo fitimprurëse, në përputhje me legjislacionin shqiptar. Fondacioni “BESA” filloi aktivitetin e tij në Maj 1999 me V.K.M, Nr.207 datë 28.04.1999 kur projekti i Mikrokredisë Urbane (filluar që prej vitit 1994) u transferua tek Fondacioni “BESA” me themelues Fondacionin “SOROS”. Ky fondacion ka operuar si një institucion kredidhënës, duke shpërndarë kredi në biznese të ndryshme, të cilat kanë marrë me përqindje të lartë kredi nga ky fondacion, i cili kushtin kryesor në nenin 4 të statutit të tij ka qëllim jofitimprurës. Në fakt fitimi vjetor i këtij fondacioni në fillimet e veta ishte 24 për qind për çdo kredi. Por ky fondacion u kthye më pas në fond dhe kjo falë ish-guvernatorit Ardian Fullani. Lincecimi i fondit është bërë në mënyrë shumë mistike. Fillimisht BSH deklaroi se Fondi “Besa” ka aplikuar, por nuk ka marrë licencë dhe befas njoftoi licencimin, ndërkohë që në atë datë nuk kishte asnjë mbledhje të Këshillit Mbikëqyrës. Përveç kësaj, Fullani ishte dhe në konflikt interesi, pasi gruaja e tij Arjana Fullani ka qenë nga viti 2005 deri ditën që u bë anëtare e Gjykatës së Lartë, kryetare e Bordit të Drejtorëve të Fondacionit Soros në Shqipëri.
Pra këtu shihet qartë një skemë piramidale financiare, e cila fillon me Fondacionin Soros dhe implikon dhe ish-guvernatorin e Bankës së Shqipërisë, i cili ka konflikt të hapur interesi. Duke krijuar këtë veprim ish-guvernatori i Bankës së Shqipërisë ka lejuar një fondacion të shërbejë si subjekt jo bankë për të dhënë kredi pa qenë fillimisht i licencuar. Nga kjo mund të themi se Gent Sejko është një tjetër Fullan dhe si për koicidencë mori mandatin e lënë në mes nga ai dhe duke e pasur mirë me të gjithë, pritet të mbajë një mandat të plotë. /Kliti Topalli
