Adriatik Llalla rrezikon të jetë “kurbani” i parë për hapjen e negociatave. Dhjetori është muaji vendimtar për fatin e Shqipërisë dhe Brukseli e ka bërë të qartë se duhet të ketë hetim të korrupsionit në nivele të larta.
Dy zyrtarët që janë në proces janë ish-Kryeprokurori Adriatik Llalla dhe ish-ministri i Brendshëm, Saimir Tahiri. Ky i fundit u dënua nga Shkalla e Parë, por Apeli e ktheu për rigjykim, ndërsa tani çështja ka shkuar në Gjykatën e Lartë. Sa i takon Llallës situata është më e komplikuar. Prokuroria e Posaçme mbylli hetimet ndaj tij dhe e akuzon për fshehje të pasurisë.
Në verë dosja shkoi në gjykatë, por avokati i tij kërkoi rishikim të shpenzimeve në Gjermani dhe u la afat deri në nëntor. Dje ka rinisur gjyqi për Llallën, ku u mbajt seanca paraprake, e cila do të vendosë nëse do të shkojë për gjykim dosja apo do kthehet mbrapsht. Ashtu siç gazeta e paralajmëroi pak ditë më parë, prokuroria ka shkuar me prova dhe argumenta të reja në ngarkim të ish-Kryeprokurorit.
Gazeta ka siguruar dosjen fillestare të SPAK, ku jepen detaje se si Llalla dyshohet që ka fshehur pasurinë, por prokuroria e ka rishikuar në tërësi dosjen, duke paraqitur akte të reja që komplikojnë pozitën e ish-kreut të akuzës. Nga ana tjetër avokati i tij ka kërkuar që të shtyhet seanca dhe të njihet me aktet shtesë të prokurorisë.
Sipas burimeve, prokuroria ka blinduar dosjen ndaj Llallës dhe kjo vjen në një moment mjaft të vështirë. Gjermania, Franca dhe Holanda duan prova në luftën ndaj korrupsionit. SPAK e BKH janë në këmbë, por nuk kanë dhënë prova në këtë aspekt dhe Llalla është zyrtari i parë që dërgohet në gjykatë nga SPAK, pasi Tahiri u dënua nga Krimet e Rënda.
Dosja e Llallës
Gazeta ka siguruar detaje nga dosja e ish-Kryeprokurorit, ku prokuroria jep argumente se përse dyshohet që ai ka fshehur pasurinë reale. Edhe nga një vëzhgim i thjeshtë i deklarimeve të tij në ILDKP rezulton se Llalla ka blerë shumë prona lirë dhe i ka shitur shtrenjtë.
Kjo gjë evidentohet dhe në dosje. “Krijohet bindja që i pandehuri Adriatik Llalla ka fshehur vlerën e pasurive të paluajtshme të blera prej tij, duke lidhur kontrata shitblerjeje për blerjen e pasurive të paluajtshme me çmim tepër të ulët krahasuar me çmimin e tregut. Rezulton se në katër raste, pasuritë janë blerë nga G.B, i cili nga ana e tij pasuritë i ka blerë nga persona të tjerë dhe pas një periudhe rreth dy apo tre mujore ia ka shitur ato të pandehurit Adriatik Llalla”, thuhet në dosje.
Më tej tregohet se si Llalla bleu një tokë me sipërfaqe 4500 metra katrorë me çmimin 1 mijë lekë metri katror. Por një vit pasi kishte blerë tokën, Llalla ka bërë rivlerësim të saj duke deklaruar se metri katror ishte 8.071 lekë. Pra kemi një tetëfishim të vlerës brenda një viti. Kështu ka ndodhur dhe me disa banesa dhe toka të tjera.
Pagesat në Gjermani
Arsyeja se përse u shty gjyqi deri në nëntor janë shpenzimet e Llallës në Gjermani. Ky i fundit ka pasur atje familjen dhe ka kryer shpenzime për qera banimi dhe për shkollimin e fëmijëve. Prokuroria ka marrë nga autoritetet gjermane të gjitha të dhënat. Sipas dosjes, Llalla ka firmosur një kontratë qeraje me Nortbert dhe Gabriele Ochmann, ku bie dakord që në muaj do të paguajë 1175 euro qera.
Kontrata ka afat 1-vjeçar. Sipas të dhënave të marra nga Berlini, Llalla i ka paguar menjëherë në dorë paratë për 1 vit qera. Pra ai u ka dhënë pronarëve të banesës 14.100 euro kesh. Por prokuroria ka ngritur dyshime këtu sepse Llalla në ILDKP ka deklaruar shpenzime për qera vetëm 7.050 euro, pra gjysmën e vlerës. Një tjetër aspekt i dyshimtë sipas organit të akuzës është ajo e shpenzimeve për shkollimin e fëmijëve në Bremen.
Sipas dosjes, për shkollimin tyre në llogarinë bankare të shkollës janë derdhur 45 mijë euro nga shtetasja Sabine Jaekel Meyer. Sipas prokurorisë kjo shumë është dhënë nga Llalla. Po ashtu ka dhe raste të tjera që pretendohet se ka shkelje.
