Nga Adriatik Doçi
Nuk thonë kot se çdo e keqe e ka një të mirë.
Goditja e sistemeve të sigurisë nga hakersat e vendeve armiqësore ka zbuluar disa sekrete me interes të lartë publik dhe që mund të ndihmojnë SPAK në hetimin e korrupsionit në nivele të larta në Shqipëri.
Në pah dalin lidhje të tjera të Ilir Metës me Kastriot Ismailajn, zbatuesin e skemës së vjedhjes së parave publike, e njohur si afera CEZ-DIA, për të cilën u dënua vetëm Ismailaj.
Djali i hallës së Monika Kryemadhit, Majlind Lazimi, ish drejtor i Postës kur LSI-ja ishte në pushtet dhe më pas këshilltar i Ilir Metës në Presidencë, rezulton se ka udhëtuar jashtë vendit me Kastriot Ismailajn, për të cilin çekët kanë dëshmuar se ua ka sugjeruar Ilir Meta si njeriu i tij.
Dorian Duçka, një nga njerëzit më të besuar dhe djali i dajës së Ilir Metës, ish-zv/ministër i Industrisë dhe Energjisë në periudhën 2013-2015 në qeverinë Rama-Meta, i propozuat nga LSI, Drejtor i Integrimit Europian në ministrinë e Ekonomisë, Tregtisë dhe Energjisë (2009-2013), ka udhëtuar gjithashtu me Kastriot Ismailajn jashtë vendit.
Me Kastriot Ismailajn ka udhëtuar edhe Bardhyl Hasanbelliu, vëllai i Irfan Hysenenbelliut, i lakuar si një personazh që menaxhon bizneset e Ilir Metës. Ky i fundii zbarkoi Partinë e Lirisë për të mbrojtur zaptimin e bregut të detit nga Fania, përmes zgjatimit të hotelit.
Ilir Kulla, këshilltar dhe dora e Ilir Metës në shumë punë të zeza, i cili sipas prokurorisë italiane porositi për llogari të Metës ‘Fake News-i’ për mbetjet nga Italia në Shqipëri, ka udhëtuar gjithashtu me Kastriot Ismailajn.
Grupi i besuar i Ilir Metës rezulton se kishte rrethuar Kastriot Ismailajn, i cili konsiderohet si dora e Metës në vjedhjen e të paktën 5 milionë eurove. Udhëtimet intensive përkojnë me kohën e gatimit të aferës CEZ-DIA.
Se pse 4 njerëzit e Metës kanë udhëtuar me Kastriot Ismailajn dhe çfarë interesi fshihet pas, këtë duhet ta gjejë SPAK, duke ndjekur rrugën e parave.
Po Monika Kryemadhi a ka udhëtuar, drekuar dhe bërë shoping me bashkëshorten e Kastriot Ismailajt, Vojsava Ismailajn?
Faktet e reja vijnë në këtë kontekst:
Jozef Hejsek: Ismailajn na e rekomandoi Ilir Meta
Jozef Hejsek, ish-shefi ekzekutiv i CEZ, ka deklaruar se Ilir Meta kishte rekomanduar Kastriot Ismailajn si “njeriun e tij të besuar” për mbledhjen e borxheve të vjetra për llogari të CEZ Shpërndarje. Jozef Hejsek ka dëshmuar se Ismailaj u trajtua si njeriu i qeverisë shqiptare për mbledhjen e borxheve të vjetra, pasi u prezantua si aleati i ngushtë i ministrit të Punëve të Jashtme në atë kohë, Ilir Meta dhe i ish-kryeministrit Sali Berisha nga ambasadori shqiptar i asaj kohë në Pragë, Qazim Tepshi.
Jozef Hejsek ë bëri këtë dëshmi më 26 tetor 2014 në Pragë për llogari të avokatëve të studios ligjore të OSHEE-së, Clifford Chance, në kuadër procesit të arbitrazhit që po zhvillohej në gjykatën e Vjenës, ku kompania e Kastriot Ismailajt, Debt International Advisory, kërkonte 130 milionë euro dëmshpërblim për prishjen e kontratës nga OSHEE, pas largimit të CEZ. Hapja e procesit penal në Tiranë detyroi Kastriot Ismailajn që të tërhiqej nga arbitrazhi.
Dritan Prifti: Meta udhëtoi në Çeki për kontratën CEZ-DIA
Dritan Prifti, një nga njerëzit më të afërt të Ilir Meta, më pas armiku i tij më i përbetuar, ka rrëfyer se Meta ka udhëtuar pati udhëtuar në Çeki për të negociuar kontratën për Kastriot Ismailajn, të cilin e konsideronte si një person me dosje. “Ideja ishte që CEZ kishte 200 milionë euro borxhe të pa mbledhura dhe, nëse ai i mblidhte ato, merrte gjysmën”, tha Prifti. Ish ministri i Energjetikës e bëri këtë deklaratë 4 vite para se të plase skandali. Në vitin 2015, Prifti ka dhënë edhe një dëshmi në prokurori për lidhjet e Metës me Kastriot Ismailajn. Prifti tha se kanë marrë para nga Kastriot Ismailaj edhe 5 deputetë të LSI-së.
“Nga llogaria e DIA-s kanë shkuar para drejtpërdrejt për persona që sot janë deputetë të LSI-së. Një prej tyre është deputeti i Shkodrës Agron Çela. Nga DIA kanë shkuar para për kompaninë e Agron Çelës që sot është deputet i LSI-së, për arsye se do të bliheshin ca makina, ca motora që nuk u blenë kurrë, por para që kuptohet janë përdorur pastaj për fushatën zgjedhore të vitit 2011-të”, tha Prifti.
Gruaja e Ismailajt: Meta vinte në shtëpinë tonë
Gruaja e Kastriot Ismailajt, Vojsava, ka rrëfyer lidhjet e forta mes Ilir Metës dhe bashkëshortit të saj. Ajo ka treguar për vizitat familje dhe SMS-të që Meta i nisi Kastriot Ismailajt. “Ilir Meta dhe bashkëshortja e tij, Monika, shpesh herë vinin në shtëpinë tonë….Mjafton që të shohësh SMS-të që Ilir Meta i dërgonte Kastriotit në vitet 2010, 2011 dhe e kupton lehtësisht këtë. Kastrioti ka qenë gjithashtu shpesh nën presion për të dhënë para nga bizneset e tij, për të ushqyer fushatat elektorale”, tha ajo. Pas këtyre deklaratave, Vojsava nuk pranoi të shprehj më për media, pasi kishte marrë kërcënime serioze.
Berisha: Prokuroria të marrë nën hetim Metën
Në shtator të vitit 2015, Sali Berisha deklaronte në Parlament se Ilir Meta nuk kishte pasur asnjë tagër për të negociuar kontratën CEZ-DIA në Pragë. Duke besuar dëshminë e Jozef Hejsek, Berisha i bëri thirrje Prokurorisë që të merrte menjëherë nën hetim Metën, i cili i ka mohuar gjithnjë akuzat. “Një dëshmi tjetër vjen nga ish administratori i CEZ se Ilir Meta si Ministër i Jashtëm e ka takuar në Pragë dhe ka negociuar me Hajsek për Kastriot Ismailajn, duke shfrytëzuar kështu postin zyrtar dhe mashtruar për interesin e xhepit të tij.
Deklaroj këtu me përgjegjësi të plotë se Ilir Meta si Ministër i Jashtëm nuk ka pasur tagër për të negociuar me CEZ për asnjë lloj problemi. I bëj thirrje Prokurorit të Përgjithshëm të nise hetimin e menjëhershëm për Ilir Metën për këtë aferë korrupsioni ndërkombëtar. Ju bëj thirrje qytetarëve shqiptarë të mos pajtohen kurrë me qëndrimin e oligarkëve Rama-Meta që duan me imunitet të bllokojnë drejtësinë”, tha Berisha.
Meta mesazh Ismailaj: Dua urgjent 200…
Në qershor të 2019, Shqiptarja.com publikoi një investigim, ku Ilir Meta, një ditë para zgjedhjeve te 2009, i kërkon me urgjencë Kastriot Ismailaj një shumë prej 200 mijë euro.
Një ditë para zgjedhjeve parlamentare në 22 qershor 2009, Meta i thotë Kastriotit në orën 17:57 me një SMS me tekst: “Nesër në darkë duhet të takohemi patjetër. Më duhen 200 mijë patjetër. Mos harro”. Mesazhi doli në pah nga një dosje e prokurorisë për krimet zgjedhore, gjatë përgjimeve, ku doli në skenë Kastriot Ismailaj. Mesazhi, i cili vijon të mos i bëjë përshtypje SPAK-ut, konfirmonte edhe një herë se Kastriot Ismailajt ishte thjeshtë maska e Metës në afër CEZ-DIA.
