Bashkim Dedja është gjyqtari i radhës që del para gjykatës, si i hetuar për shkak të shkeljeve që iu gjetën gjatë vetingut.
Ish-kreu i Gjykatës Kushtetuese ka dalë dje para gjykatës, ku u mbajt seanca paraprake mbi akuzat e ngritura nga Prokuroria e Posaçme. Ai akuzohet për fshehje pasurie dhe në gusht dosja u dërgua për gjykim.
Gjykata u mblodh dje për të vendosur nëse do kalojë apo jo për gjykim çështja dhe vendimi u shty për më vonë, pasi Dedja kërkoi që të njihet me aktet e prokurorisë. Pak ditë më parë para gjykatës doli kolegu i tij Fatos Lulo, por për të dosja u kthye për rishqyrtim, pasi gjykata kërkoi të bëhet një ekspertizë financiare me ekspertë të pavarur. Lulo dhe Dedja janë të parët gjyqtarë që janë dërguar për gjykim në kuadër të hetimeve që nisën pas dyshimeve në veting se ata kishin fshehur pasuritë. Ndërkohë për ta është vendosur sekuestro preventive dhe për disa pasuri.
Gjykata e Posaçme e Shkallës së Parë për Korrupsionin dhe Krimin e Organizuar, me vendimin nr.8, datë 20.4.2021, vendosi pranimin e kërkesës së Prokurorisë së Posaçme Kundër Korrupsionit dhe Krimit të Organizuar Tiranë dhe vendosjen e sekuestros mbi pasurinë në zotërim të shtetasit Bashkim Dedja, e llojit apartament, me sipërfaqe 60 m2, e ndodhur në zonën Kryemedhenj, Njësia Administrative Golem Kavajë. Në po të njëjtën ditë gjykata vendosi pranimin e sekuestros mbi pasurinë në zotërim të shtetasit Fatos Lulo, me sipërfaqe 172 m2, e llojit Njësi/Dyqan, e ndodhur në rrugën e Durrësit, Tiranë.
Hetimet e të ngelurve në veting
Janë rreth 200 persona të ngelur në veting deri më tani, por vetëm për 3 emra kanë avancuar hetimet, pasi bashkë me Dedjen e Lulon po hetohet edhe Shkëlzen Selimi. SPAK ka rreth 28 emra në hetim, por ende nuk ka asnjë lëvizje në këtë aspekt. Ndërkohë janë shumë të tjerë që duhet të hetohen nga prokuroritë e rretheve që nuk po ju hyn gjemb në këmbë. Hetimi i tyre është një kusht i Bashkimit Europian. Në tetor ministrat e BE do mblidhen sërish për të diskutuar mbi fatin e Shqipërisë dhe Maqedonisë së Veriut dhe ndër të paktat kushte që nuk po plotësohen është hetimi i të ngelurve në veting dhe hetimi i politikanëve.
Duke qenë se këtë herë vendimi i BE pritet të jetë deçiziv, pritet të shtohet presioni ndaj autoriteteve për të lëvizur në këtë aspekt. Në raportin e publikuar nga Prokuroria e Posaçme për vitin 2020, bëhet me dije se hetimet janë shtrirë edhe jashtë vendit për disa gjyqtarë dhe prokurorë të dyshuar si të përfshirë në korrupsion. “3 kërkesa, ose 4.34% e tyre kanë të bëjnë me hetime në fushën e veprave penale të “Korrupsionit aktiv të personave që ushtrojnë funksione publike”, “Korrupsionit aktiv të gjyqtarëve, prokurorëve dhe funksionarëve të tjerë të drejtësisë”, “Korrupsionit aktiv të gjyqtarëve, prokurorëve dhe funksionarëve të tjerë të drejtësisë”, parashikuar nga nenet 244, 319, 319/ç të Kodit Penal”, thekson raporti. Ndërkohë SPAK ka me qindra dosje korrupsioni për deputetë, ministra dhe zyrtarë të lartë dhe me ngritjen e Byrosë së Hetimit pritet që të ketë goditje të bujshme.
