Kompania ajrore shqiptare “Air Albania” kryen fluturimin e parë të shtunën. Lajmin e bëri të ditur kryeministri Edi Rama.
“Kompania e patë ajrore që mban flamurin shqiptar do të nisë fluturimet ditën e shtunë. Destinacioni i parë i saj është linja Tiranë-Stamboll-Tiranë”, informoi shefi i qeverisë.
Air Albania është kompani me kapital shqiptar e ndarë mes privatit dhe shtetit. Kryeministri Rama tha se objektiv është që vendi të ketë edhe dy aeroporte të tjerë por, shtoi se do të punohet për t’u arritur 3 të tillë.
“Unë dua që Shqipëria, të paktën këtë mandat, të ketë edhe 2 aeroporte të tjerë por unë do të luftoj që të kemi 3. Do të hapim aeroportin e Kukësit pranverën e ardhshme, do të bëjmë Kukësin me aeroport, do jetë një ndryshim i madh në perspektivë për të gjithë Verilindjen.
Do të fillojmë aeroportin e Vlorës, po punojmë dhe shpresoj edhe për aeroportin e Sarandës, nesër pasdite do të jetë gati avioni i parë i “Air Albania” që fillon fluturimet pasnesër. 1 muaj do të jenë fluturime testi dhe më pas do të jetë shtëpia fluturuese e shqiptarëve që do të shkojë në Romë, Milano, Bolonja, Londër edhe në Stamboll natyrisht, me çmime më të arsyeshme dhe shërbim më të mirë”, deklaroi Rama.
Duke fillar nga muaji Tetor, “Air Albania” do të nisë fluturimet edhe në linja të tjera. Destinacione do të jenë kryeqytetet kryesore evropiane si Roma, Londra, Athina, Mynihu etj.
