Besoj se të gjithë i njohim rolet e saj në shumë nga teatrot dhe filmat më në zë të kohës. Nuk e di për ju, por mua më pëlqen shumë look-u që ka tek “Pallati 176”, me flokët gjysmë të ondëzuar dhe xhaketa sportive me xhepa tek mëngët, e cila ka bërë mjaftueshëm zhurmë në atë kohë.
Duket që filmat paskan patur një ndikim më të madh se sa çdo gjë tjetër. Edhe pse dyshoj nëse ka patur javë mode apo sfilata.
Ishte më e thjeshtë të imitohej veshja e një personazhi filmash, se sa të krijoje diçka të re nga fillimi. Nuk ka ndryshuar shumë edhe sot, përveç fokusit, të tjerat thuajse janë njësoj. Shohim dikë të veshur bukur dhe rendim diku që ta realizojmë të njëjtën veshje, mundësisht me kosto më të ulët.
Personalisht ky fustani blu cerulean, me mëngë voluminoze dhe detaje në bust është i preferuari im. Supozoj se materiali duket jersey në pambuk, i cili është ideali për pranverë apo vjeshtë. Koleksionet e vjeshtë/dimër `17-`18 janë bazuar në flutura, pala, detaje voluminoze dhe ngjyra dominante.
Këto syzet oversize optike unë do i mbaja dhe sot. Besoj dhe jam e sigurt që për kohën kanë qenë mjaft të përparuara si formë. Pastaj fustani gingham me rozë dhe të bardhë nuk ka nevojë për koment, përveç faktit se mund të vishet ende edhe sot.
Dobësia e Evës për pallto dhe pardesy të mirëstrukturuara është e dukshme thuajse në çdo film apo teatër. Ka eksperimentuar si me prerjet në bel po ashtu dhe me “box”, ose prerje kuadrat. E bukura është se në një intervistë të dhënë pak kohë më parë ajo sqaron se të gjitha veshjet janë nga gardëroba e saj. Ndoshta një ditë duhet ta vizitoj me imtësi nga afër.
Dihet që në vitet `50-`80 fundet me flutura dhe pala u bënë kryefjalë të veshjeve të paradites. Ishin kaq komode dhe me stil sa mund t`i vishje kudo, edhe në punë. Por mënyra se si kombinoheshin ishte tërësisht personale dhe e veçantë për gjithsecilën. Eva ka preferuar ta kombinojë të kuqen me të bardhë (edhe pse shumica do e vishnin me të zezë). Ndoshta duhet të mësojmë pak më tepër për vajzat që kanë personifikuar modën në vitet `80 përpara se të hapim instagramin./Nga Stela Sallaku
