Partia Demokratike ka reaguar në mënyrë zyrtare në mbrojtje të kryetarit Lulzim Basha, ndaj akuzave për përfshirje në hetimin e UÇK dhe zhdukjen e kasetës filmike me masakrën e Krushës.
Në një deklaratë zyrtarel, PD shprehet se gjithçka është një maskaradë e Edi Ramës me mediat e tij.
Sipas PD, Lulzim Basha, në asnjë ditë të punës së tij në UNMIK, nuk ka marrë pjesë në asnjë proces ndaj anëtarëve apo drejtuesve të UÇK-së.
Për të ky është një fakt i konfirmuar edhe nga ish- kryeprokurori i EULEX, Williamson, ndërkohë që nënvizon se për këto skenarë do të dëgjojnë shqiptarët deri më 25 prill.
Reagimi i plotë i PD:
Partia Demokratike e Shqipërisë përbuz me neveri maskaradën e orkestruar nga Edi Rama dhe Top Channel kundër kreut të opozitës Lulzim Basha.
Deklaratat e fabrikuara janë në shërbim të pushtetit të Edi Ramës dhe të pasurimit të paligjshëm të mercenarëve të tij, të fshehur pas incineratorëve.
Në asnjë ditë të punës së tij në UNMIK, Lulzim Basha nuk ka marrë pjesë në asnjë proces ndaj anëtarëve apo drejtuesve të UÇK-së. Ky është një fakt i konfirmuar edhe nga ish- Kryeprokurori i EULEX, Ëilliamson.
Deklaratat e rreme të orkestruara nga Edi Rama nuk dëmtojnë aspak Lulzim Bashën. Ato shkojnë kundër interesit kombëtar, duke dëmtuar imazhin e Kosovës dhe Shqipërisë.
Sa herë është para humbjes së zgjedhjeve, Edi Rama zbaton të njëjtin skenar shpifjesh kundër Lulzim Bashës. E bëri atë në 2005-ën, në 2011-ën dhe po riciklon sërish skenaret e denja për Sigurimin e Shtetit.
Të tillë skenarë imagjinarë kundër Lulzim Bashës do të dëgjoni pa ndërprerje deri në 25 Prill! Rama nuk ka asnjë alternativë dhe nuk ka me çfarë ta mbulojë tjetër dështimin e 8 vitëve në pushtet. Përbuzeni Edi Ramën dhe mercenarët e tij!
