Kryeministri i Kosovës, Albin Kurti gjatë takimit me kreun e qeverisë Edi Rama në Prishtinë, tha se do të punojnë për një treg sa më unik, që qytetarët dhe mallrat të lëvizin sa më lirshëm.
Ai theksoi, se në takim u fol edhe mbi avancimin e marrëveshjeve të mëparshme. Po ashtu, Kurti njoftoi se në gjysmën e dytë të muajit nëntor do të mbahet një mbledhje e përbashkët mes dy qeverive. “Ne mbetemi në gadishmëri për të realizuar sfidat. Ne duhet të rrisim bashkëpunimin për më shumë drejtësi, barazi zhvillim e mirëqenie për zhvillimin e shqiptarëve.
Ndërlidhja ndërmjet dy vendeve dhe heqja e barrierave është domosdoshmëri. Do të punojmë që tregu të jetë sa më unik, që qytetarët dhe mallrat të lëvizin sa më lirshëm. Biseduam për të gjitha fushat për qeverisjen tonë të mirë dhe e shohim si të rëndësishme koordinimin dhe sinkronizimin gjithë andej. Biseduam edhe për avancimin e marrëveshjeve tona të mëparshme.
Mbledhja përbashkët në gjysmën e dytë të muajit nëntor. Do të kemi një sekretariat koordinues për dy vendet”, tha Kurti. Ndër të tjera, në konferencën e përbashkët për shtyp, pas takimit në Prishtinë, kryeministri i Kosovës Albin Kurti, tha para gazetarëve se do të japë një njoftim të rëndësishëm. Ai u shpreh se gjatë takimit me kryeministrin Edi Rama, përreth një orë e gjysmë, nuk është përmendur fare fjala Ballkan apo Serbi, por vetëm Kosovë dhe Shqipëri. “Në fund dua të jap një njoftim të rëndësishëm.
Gjatë takimit tonë, rreth 1 orë e gjysmë, ku kryeministri Rama ka ardhur pothuajse me gjysmën e kabinetit të tij dhe unë thuajse me gjysmën e kabinetit, më shumë kanë biseduar ministrat tanë, se ne të dy. Për një orë e gjysmë nuk është përmendur as fjala Ballkan, as Serbi, përveç Kosovë e Shqipëri. Mos të krijohet përshtypja se ne kur takohemi flasim vetëm politikë ndërkombëtare, se kemi aq shumë punë për të bërë”, tha ndër të tjera Kurti.
