Aleatët tradicionalë të Partisë Demokratike nuk do të përfitojnë asnjë fond për zgjedhjet e 25 prillit. Në Shqipëri janë mbi 100 parti të cilat, historikisht kanë përfituar fonde pas zgjedhjeve, por me ndryshimet ligjore një vit më parë, kush nuk kalon një për qind të votave nuk merr fond.
Më të penalizuara janë partitë të cilat janë aleate të PD si: Partia Agrare Ambientaliste, Partia Lëvizja e Legalitetit dhe Partia Bashkimi për të Drejtat e Njeriut. Ndërkohë, Komisioni Qendror i Zgjedhjeve, në mbledhjen e zhvilluar dje, ka përcaktuar vlerën e një vote të vlefshme në zgjedhjet e 25 prillit.
Sipas KQZ, vlera e një vote të vlefshme është 85 lekë të reja. Këtë e bëri të ditur kreu i KQZ Ilirjan Celibashi, i cili gjithashtu bëri me dije se nga fondi prej 130 milionë lekësh, PS përfiton 48.6% të vlerës së buxhetit, PD merr 39.4%, LSI 6.8% dhe PSD 2.2%, ndërsa për partitë e tjera të përfshira në zgjedhjet e 25 prillit, nuk do të ketë kompensim financiar, pasi në vlerësimin e KQZ ato nuk kanë kaluar pragun e 1% të votave.
“Vlera në para të një vote të vlefshme është 85 lekë. Pika e dytë ka të bëjë me kompensimin financiar pas zgjedhor. Partitë Politike që kanë qenë të regjistruara si subjekte zgjedhore kanë përfituar fonde paradhënie, për zgjedhjet e 25 prillit, janë 10 parti politike.
Që një parti pas zgjedhjeve të kompensohet duhet të kalojë këtë 1%. Partitë që nuk kanë përfituar fonde janë tre, Partia Agrare Ambientaliste, Partia Lëvizja Legalitetit dhe Partia Bashkimi për të Drejtat e Njeriut. Këto tre parti duhet të kalonin 1%-in, asnjë nuk e kaluar të merrte mbi 15 mijë vota.
Për këtë arsye nuk kompensohen. Bazuar në nenin 19 në shkronjën K dhe M, vendos të mos shpërndajë kompensimin financiar pas zgjedhor për asnjë parti politike pjesëmarrëse në zgjedhjet e 25 prillit”, tha ai.
KQZ gjobit 106 parti
Ndërkohë, Komisioni Qendror i Zgjedhjeve ka gjobitur me gjoba 1 dhe 2 milionë lekë 106 parti që nuk dorëzuan raportet financiare për vitin 2020 dhe 50 mijë lekë për katër parti të tjera që i patën dorëzuar ato me vonesë. Afati i fundit për dorëzimin e raporteve financiare ishte data 31 mars, ndërsa Komisioneri Shtetëror Ilirjan Celibashi, theksoi se nga këto 106 parti politike, të cilat nuk kanë dorëzuar bilanc janë 11 parti politike që kanë qenë pjesë e zgjedhjeve të datës 25 prill 2021.
“Janë 106 parti të cilat nuk kanë dorëzuar raportet financiare brenda afatit edhe në momentet që flasim nuk e kanë dorëzuar. 4 prej këtyre e kanë dorëzuar, por pas afatit. Ne vendosim gjobë në masën 1 milion lekë për partitë politike që nuk kanë dorëzuar raportin financiar. Gjobë në masën 15 mijë lekë për partitë politike që e kanë dorëzuar raportin pas afatit të caktuar”, tha Celibashi.
