Aleatët e Partisë Demokratike kanë folur dje sa i takon reformës zgjedhore. Gjatë kësaj jave ka pasur zëra se aleatët e Bashës kanë hequr dorë nga ndryshimi i sistemit nëse gjatë këtij viti do të mbahen zgjedhje të parakohshme, deklarata këto që kanë shkaktuar debate në korridoret e politikës dhe jovetëm.
Por ditën e djeshme kreu i PDK, Nard Ndoka; kreu i PR, Fatmir Mediu; kreu i PAA, Agron Duka dhe kreu i LZHK, Dashamir Shehi gjatë një prononcimi për gazetën “SOT” kanë hedhur dritë hije, duke dhënë versionin e tyre se si qëndron e vërteta. I pari ka qenë kryedemokristiani Nard Ndoka, i cili gjatë një prononcimi për gazetën, deklaroi dje se ai e mbështet ndryshimin e sistemit, ndërsa theksoi se emergjencë për të është largimi i Edi Ramës si kryeministër. Për zotin Ndoka ndryshim i Kodit Zgjedhor është një debat i gjerë, në mënyrë që në finale të miratohet një Kod gjithëpërfshirës. “Unë e mbështes ndryshimin e sistemit zgjedhor.
Por për mua emergjencë kombëtare është largimi i Edi Ramës si kryeministër, në mënyrë që të mos jetë ky personi për organizimin e zgjedhjeve. Ndërsa sa i takon Kodit Zgjedhor apo ndryshimit të sistemit mendoj se më tepër problem janë standardet e demokracisë, që të kemi një Kod Zgjedhor sa më përfaqësues, që të jetë i përputhur dhe përshtatur me Kushtetutën. Por kjo do të vijë pas një debati të gjerë dhe mund të ishte shumë interesante që Kodi të miratohet dhe të ketë një fuqi që pas katër viteve të mos ketë ndikim asnjë mazhorancë për ndërhyrje në sistem”, deklaroi Ndoka.
Duka: Nuk mund të shkojmë nga shiu në breshër
Por idenë se zgjedhjet e parakohshme dhe largimi i Edi Ramës nga kryeministër janë emergjencë kombëtare e ka mbështetur edhe kreu i PAA, Agron Duka. Ky i fundit gjatë një prononcimi për gazetën “SOT” deklaroi dje se vendi duhet të shkojë sa më shpejt në zgjedhje të parakohshme, ndërsa shtoi se nëse Kodi Zgjedhor ndryshon pa u bërë asnjë debat gjithëpërfshirës, sipas tij, rrezikohet të shkohet drejt një sistemi më të keq si ai që është aktualisht. “Mua më vjen shumë mirë që sistemi zgjedhor po merr vëmendje mediatike, sidomos nëse kemi parasysh faktin që unë dhe kolegët e mi kemi folur për ndryshimin e tij gjithë këto vite. Sikundër, duke qenë konsekuentë me qëndrimet e mia të kahershme, unë jam për ndryshimin e sistemit. Por, kriza politike, ekonomike, sociale dhe e sigurisë (vendi është kthyer në një morg të madh), kërkon zgjidhje të menjëhershme nëpërmjet zgjedhjeve të parakohshme. Nëse ne do të ndryshonim sistemin në këtë moment, pa një debat gjithëpërfshirës, pa sigurinë që ai që do të zgjedhim do të jetë më i përshtatshmi për realitetin tonë, rrezikojmë të kalojmë nga shiu në breshër. Prandaj ne jemi pajtuar me ndërhyrje në dy kohë, sepse duhet të hedhim hapa të sigurta drejt të ardhmes”, deklaroi Duka.
Shehi: Nëse zgjedhjet mbahen tani, jo ndryshim sistemi
Në të njëjtën linjë me kolegët e tij, dje është rreshtuar edhe kreu i LZHK, Dashamir Shehi. Ky i fundit gjatë një prononcimi për gazetën “SOT”, deklaroi dje se nëse zgjedhjet e parakohshme do të mbahen këtë vit , sipas tij, nuk ka arsye për t’u ndryshuar sistemi, pasi opozita duhet të futet në zgjedhje me çfarëdo lloj Kodi vetëm e vetëm që të rrëzohet Rama nga pushteti. “Unë si kreu i LZH vijoj t’i qëndroj mendimit se nëse do të kemi zgjedhje të parakohshme këtë vit ne duhet të hyjmë në garë për të sfiduar Edi Ramën me këtë sistem. Çdo lloj sistemi që propozohet tani në kushtet e emergjencës është i pranueshëm nga ne, pasi për ne i rëndësishëm është largimi një orë e më parë i kësaj qeverie. Madje, këtë ide dhe këtë tezë kam mbrojtur edhe gjatë mbledhjes që zhvilluam me kryedemokratin Lulzim Basha pak ditë më parë, ku jam shprehur se me këtë sistem duhet të hyjmë në zgjedhje nëse mbahen tani. Pastaj nëse zgjedhjet mbahen në 2021 kur thotë edhe Edi Rama, mendoj se sistemi zgjedhor duhet të ndryshojë dhe të reflektohen në të gjitha propozimet tona”, deklaroi Shehi. /Rigels Seliman
