Amazon është bërë kompania e dytë më e vlefshme sipas “Wall Street”, duke kaluar vlerën e një trilion dollarëve, vetëm pak javë pasi këtë rekord e arriti për herë të parë në histori kompania Apple.
Arritja e kësaj vlere shënon edhe kapitullin e fundit në historinë e mahnitshme të rritjes së kësaj kompanie, të themeluar nga biznesmeni Jeff Bezos në Seattle të Uashingtonit në vitin 1994.
Në më pak se 25 vite, kompania ka siguruar një prani të ndjeshme në thuajse gjithçka: nga shitjet me pakicë te artikujt ushqimorë, e deri te transmetimet video, duke bërë që ajo të sigurojë të ardhura deri në 178 miliardë dollarë vitin e kaluar.
Bezos u bë njeriu i dytë më i pasur në botë përgjatë kësaj historie suksesi, me një pasuri të përllogaritur në mbi 167 miliardë dollarë këtë të martë, sipas revistës prestigjioze “Forbes”.
Amazon u kuotua për herë të parë në bursë me një vlerë prej 18 dollarë për aksion në vitin 1997, ndërkohë që këtë të martë, aksionet kanë kapur vlerën e 2.050 dollarëve secili, gjë që e rrit vlerën e kompanisë në mbi një trilion dollarë.
Por, rritja e shpejtë e kompanisë ka ardhur mes kritikave të ashpra mbi qasjen e kompanisë ndaj taksave dhe të drejtave të punonjësve. Amazon ka qenë në një konkurrencë të ashpër me Apple për arritjen e këtij rekordi historik prej muajsh, por humbi garën kur tregjet financiare u përgjigjën në mënyrë më favorizuese ndaj rezultateve financiare të Apple të muajit të kaluar.
Të dyja kompanitë kanë tashmë një vlerë tregu prej mbi një të tretën e ekonomisë së Mbretërisë së Bashkuar, apo e thënë ndryshe më të madhe sesa ekonomitë e Turqisë dhe Zvicrës.
