Ambasadorja e Shteteve të Bashkuara të Amerikës, Yuri Kim, ka kërkuar plotësimin e Gjykatës Kushtetuese me 9 anëtarë.
Duke folur në një aktivitet të zhvilluar dje nga Gjykata e Lartë, ambasadorja Kim bëri të qartë që plotësimi i Gjykatës së Lartë i hap rrugë edhe plotësimit të Gjykatës Kushtetuese.
Ajo theksoi, se edhe Këshilli i Lartë Gjyqësor duhet që të përfundojë të gjitha procedurat lidhur me kandidatët që kanë aplikuar për t’u bërë pjesë e Gjykatës së Lartë. “Një Gjykatë Kushtetuese plotësisht funksionale është një hap që duhet ta ndërmerrni për të vazhduar ngjitjen e malit.
Ju po lëvizni në drejtimin e duhur, por unë nxis Këshillin e Lartë Gjyqësor, që të përfundojë procedurat për vlerësimin dhe të rendisë e caktojë kandidatët më të mirë të verifikuar, që kanë aplikuar për ngritje në detyrë në Gjykatën e Lartë.
Sapo Këshilli ta bëjë këtë, kjo do të hapë rrugën për udhëtimin e Gjykatës së Lartë drejt majës së malit. Majën mund ta arrini vetëm nëse punoni së bashku”, tha Kim. Ndër të tjera, ambasadorja u shpreh se plotësimi i Gjykatës së Lartë, është me rëndësi edhe për stabilitetin e vendit. Kim deklaroi, se edhe Shtetet e Bashkuara të Amerikës, po japin mbështetjen e duhur.
“Në opinionin e tij të qershorit 2020, Komisioni i Venecias nënvizoi se funksionimi i Gjykatës së Lartë mund të jetë edhe më vendimtar për stabilitetin e Shqipërisë, sesa prania e Gjykatës Kushtetuese. Për këtë qëllim, jam krenare për punën që po bëjmë për të zvogëluar numrin e çështjeve të prapambetura të Gjykatës së Lartë dhe për të vendosur politika që parandalojnë përsëritjen e tyre.
Përmes punës së nëpunësve për uljen e numrit të çështjeve të prapambetura, të mbështetur nga SHBA, ne po bëjmë pjesën tonë që të përmirësojmë efikasitetin në Gjykatën e Lartë dhe për të siguruar që një Gjykatë e Lartë funksionale të ndihmojë për t’u siguruar qytetarëve shqiptarë qasje në drejtësi, një pikë thelbësore për procesin e integrimit të Shqipërisë në BE”, deklaroi ajo.
Kim flet për plotësimin e gjykatave
Ambasadorja e Shteteve të Bashkuara të Amerikës, Yuri Kim, u shpreh se plotësimi i gjykatave duhet që të bëhet sa më shpejt. Ajo vijoi më tej, duke thënë se nuk duhet që të ndalen para pengesave që dalin para gjatë rrugës. “Që nga viti 2016, ju, aktorët kryesorë në sistemin e drejtësisë së Shqipërisë, së bashku me popullin e Shqipërisë, keni qenë duke iu ngjitur një mali.
Ky ka qenë një shteg i kthesave të papritura, sfidave dhe pengesave të paparashikuara. Jam këtu sot për t’ju kujtuar se po i afroheni majës. Ju them se pamja nga lart është e një të ardhmeje më të ndritur dhe me mundësi më të mira. Vizioni se ku mund të shkoni nga atje është i qartë. Ne do të arrijmë atje së bashku, hap pas hapi”, tha Kim.
Sakaq, ambasadorja e SHBA Kim, u shpreh se reforma në drejtësi në vend është duke sjellë sipas saj, ndryshime të rëndësishme. Ajo theksoi se, institucionet e drejtësisë duhet që të plotësohen me anëtarët e nevojshëm edhe që qytetarët të shohin se sistemi i drejtësisë në vend, do të funksionojë.
“Institucionet e drejtësisë, përfshirë Gjykatën e Lartë, janë tashmë funksionale dhe reforma në drejtësi po sjell zhvillime dhe rezultate pozitive. Publiku shqiptar meriton të shohë se çfarë janë të afta të bëjnë këto institucione me të pasur kapacitet të plotë! Të gjithë jemi duke iu ngjitur së bashku majës së atij mali. Shqipëria është tani në kulmin e reformës reale në drejtësi”, deklaroi ambasadorja Kim.
