Shtetet e Bashkuara të Amerikës i kanë dërguar një mesazh të qartë dje presidentit Ilir Meta. Teksa të gjithë liderët botërorë ziejnë nga ndikimi rus, Ilir Meta i befasoi me deklaratën e tij ditën e hënë, duke u shprehur se Moska nuk përbën kërcënim për vendin tonë dhe nuk duhet trajtuar si rreziku anglo-sakson.
Po ashtu, Meta foli me një gjuhë mjaft të butë ndaj Moskës, ndryshe nga kreu i PE, gjenerali amerikan në NATO dhe funksionarë të tjerë të lartë. Por ndaj tij duket se ka vajtur dje një mesazh shumë i qartë nga zv/ambasadorja amerikane në Tiranë, Leyla Moses-Ones.
Duke folur në një konferencë në kuadër të 70-vjetorit të themelimit të NATO dhe 10-vjetorit të anëtarësimit të Shqipërisë aty, diplomatja amerikane dha alarmin për ndikimin rus. Ajo u shpreh se Moska është kthyer në një shqetësim mjaft serioz për të gjitha vendet anëtare të NATO, pra përfshirë dhe Shqipërinë. “Rusia është e vendosur që të minojë institucionet tona demokratike dhe të mbjellë përçarje midis dhe brenda vendeve tona.
Kërcënimet e shumëfishta ruse ndaj demokracive tona kanë përfshirë sulme me agjentë kimikë dhe aktivitete keqdashëse kibernetike”, tha dje zv/ambasadorja. Mosses-Ones në deklaratën e saj ju drejtohej ministrave dhe deputetëve shqiptarë të pranishëm në aktivitetin e mbajtur në një hotel në Tiranë dhe fakti që përmendi shprehjen “vendet tona”, do të thotë se dhe Shqipëria nuk ka shpëtuar nga influenca ruse, ndryshe nga sa pretendon presidenti.
Gazeta prej javësh ka dhënë alarmin se Moska ka shtirë tentakulat në vendin tonë dhe po ashtu pas saj fshihen PD e LSI dhe liderët e tyre. Të hënën Meta i mori në mbrojtje rusët, ndërsa dje ambasada amerikane ja ka bërë të qartë se nuk ka tallje me ndikimin e Moskës. Pra duket se Presidenti po hyn në armiqësi të thelluar me SHBA.
Roli i NATO
Më tej Moses-Ones tha se NATO do punojë fort që të ndalet influenca ruse, por dhe ajo iraniane. Sipas saj, kjo luftë do forcohet edhe përmes bazës në Kuçovë. “Përballë këtyre sfidave, Shtetet e Bashkuara mbeten të përkushtuara ndaj parimit se ne, si aleatë në NATO, do të jemi gjithnjë më të fortë nëse jemi të bashkuar.
NATO është një aleancë ushtarake, por forca jonë e përbashkët vjen nga vlerat që ndajmë. Vjen nga angazhimi ynë i përbashkët ndaj të drejtave dhe përgjegjësive që janë thelbësore për demokracitë tona, të tilla si liritë individuale që gëzojmë dhe integriteti e transparenca e qeverive që na përfaqësojnë. Këto janë forca jonë më e madhe. Këto janë vlerat dhe parimet që përfaqësojmë dhe mbrojmë…
Shqipëria do të vijojë ta bëjë aleancën më të fortë nëpërmjet investimit prej 58 milionë dollarësh për modernizimin e bazës ajrore të Kucovës, e cila do të përforcojë operacionet e furnizimit nga ajri, mbështetjen logjistike, patrullimin ajror, trajnimet dhe stërvitjet”, tha ajo.
