Zbardhen detajet mbi vendimin e ambasadës së Shteteve të Bashkuara të Amerikës sa i takon bllokimit të vizave për rreth 170 zyrtarë shqiptarë. Dy ditë më parë ambasada e SHBA në Tiranë bëri të ditur se pas Tom Doshit dhe Adriatik Llallës janë qindra zyrtarë të lartë, përfshi edhe familjarët e tyre që kanë aplikuar për vizë, por nuk e kanë marrë dot atë.
Gazeta ka mësuar se një pjesë e madhe e zyrtarëve që u është refuzuar viza janë prokurorë dhe gjyqtarë, të cilët kanë ngelur në procesin e vetingut. Po ashtu, burimet thanë se një ndër arsyet që kanë çuar ambasadën amerikane që të mbajë këtë qëndrim ndaj zyrtarëve të lartë të drejtësisë, ka të bëjë me faktin se SHBA, i cilëson ata si njerëz të korruptuar.
Kujtojmë që deri më tani janë rreth dhjetra prokurorë dhe gjyqtarë që nuk e kanë kaluar veting dhe sipas informacioneve që të gjithë emrat janë në listën e zezë të ambasadës së Shteteve të Bashkuara të Amerikës, së bashku me familjarët e tyre. Në këtë listë bëjnë pjesë edhe gjyqtarët dhe prokurorët, për të cilët Operacioni Ndërkombëtar i Monitorimit dhe Komisioneri Publik ka ankimuar vendimin e KPK në Kolegjin e Posaçëm të Apelimit.
Mirëpo, nuk ndalet me kaq, pasi mësohet se listës me 170 persona priten t’i shtohen edhe zyrtarë të tjerë, të cilët sipas burimeve të ambasadës, janë ose kanë qenë të përfshirë në korrupsion dhe krimin e organizuar. Por imun nuk janë as politikanët, pasi edhe ndaj kësaj kategorie ambasada do të mbajë qëndrim sa i takon mosdhënies së vizës. Aq më tepër që burimet saktësuan se ambasada e SHBA ka arritur në këtë konkluzion, pasi shumica e zyrtarëve dhe politikanëve që u është refuzuar viza janë “armiq” të reformës në drejtësisë.
Thënë më troç, ambasada e Shteteve të Bashkuara të Amerikës në Tiranë nuk pajtohet me rivalët e reformës në drejtësi, duke e detyruar që të mbajë këtë radikal, siç ndalimi i hyrjes së tyre në tokën, qiejt dhe ujërat amerikane. Rasti më pikant është ai i ish-kryeministrit Sali Berisha, për të cilën mësohet se ambasada e Shteteve të Bashkuara të Amerikës i njoftoi refuzimin e vizës pas ftesës që i siguroi Mediu për “Mëngjesin e Lutjeve”. Megjithatë, mbetet për t’u parë në ditët në vijim se çfarë do të ndodhë më konkretisht.
Sqarimi i ambasadës
Ambasada e Shteteve të Bashkuara të Amerikës në Tiranë ka reaguar dy ditë më parë sa i takon refuzimit të vizave për 170 zyrtarë dhe ish- zyrtarë të shtetit shqiptar, të cilët rezultojnë si të lidhur me korrupsionin. Kjo shifër, sipas sqarimit të zyrës së shtypit të selisë diplomatike u takon dy viteve të fundit. “Ambasada e SHBA i merr shumë seriozisht pretendimet për korrupsion dhe do të vazhdojë të shqyrtojë vizat dhe aplikimet për vizë të zyrtarëve publikë me kontroll shtesë.
Që nga revokimi i vizave të disa gjyqtarëve dhe prokurorëve në janar 2017, Ambasada e SHBA iu ka mohuar vizat më shumë se 170 zyrtarëve dhe ish-zyrtarëve dhe familjarëve të tyre. Pozicioni i Ambasadës së SHBA kundër korrupsionit dhe synimi i saj për t’iu mohuar hyrjen në Shtetet e Bashkuara zyrtarëve dhe ish-zyrtarëve të korruptuar mbetet i pandryshuar”, thuhet në njoftimin e ambasadës./Rigels Seliman
