Një aktivitet për luftën 30 vjeçare kundër mafias është organizuar dje në Bari, ku ka marrë pjesë edhe kreu i SPAK, Arben Kraja.
Në Dhomën e Këshillit të Palazzo della Provincia di Bari, u zhvillua konferenca me temë “Bashkëpunimi ndërkombëtar”, ku morën pjesë, drejtori Qendror i Policisë Kriminale, prefekti Vittorio Rizzi, kryeprokurori i Gjykatës së Barit, Roberto Rossi, kryeprokurori i Prokurorit të Posaçëm Kundër Korrupsionit ( SPAK) në Shqipëri, Arben Kraja, Dr. Filippo Spiezia, anëtar kombëtar për Italinë në Agjencinë e Bashkimit Evropian për Bashkëpunimin për Drejtësinë Penale, etj.
Në fjalën e tij, në konferencë kreu i SPAK Arben Kraja, është përqendruar në grupet kriminale shqiptare, ndërsa ka ngritur shqetësimin se paratë e pista pengojnë zhvillimin e vendit. Ndër të tjera, kreu i SPAK Arben Kraja, vijoi më tej duke thënë se SPAK po zhvillon hetime me disa shtete si me Gjermaninë, Italinë dhe me Spanjën.
Po ashtu tha se janë 10 skuadra me Italinë. Sinjalet janë se po hetohet për trafiqet e drogës, përfshirë dhe grupet e lidhur ame politikën. Mos harrojmë se një gjeneral i arrestuar në Itali flitet se ka lidhje me një politikan shqiptar.
“Kemi 10 skuadra të përbashkëta hetimore me Italinë. Skuadra hetimore kemi edhe me shtete të tjera, Gjermaninë dhe Spanjën. Edhe pse aktiviteti kriminal mund të zhvillohet jashtë Shqipërisë, pasojat vijnë edhe në Shqipëri. Transferimi i parave nga aktiviteti kriminal bëhet në Shqipëri dhe janë para që përdoren për të dëmtuar zhvillimin e lirë e përdoren për të korruptuar sistemin dhe për të rritur më tej aktivitetin kriminal”, tha ai.
Kraja paralajmëron goditje
Ndërkohë, kreu i SPAK ka paralajmëruar goditje në kuadër të masave të marra për integrimin në Bashkimin Evropian. Ai tha, se në Shqipëri janë shtuar vrasjet mes grupeve kriminale për aktivitete të cilat sipas tij, ata i kanë krijuar jashtë Shqipërisë.
“Duke qenë të ndërgjegjshëm që në fillim që nuk mund ta bëjmë të vetëm këtë luftë dhe për këtë arsye kemi krijuar kontakte me të gjitha autoritet homologe në rajon, por edhe pak më gjerë. Ne jemi vend kandidat për t’u anëtarësuar në Bashkimin Evropian dhe në këto kushte një nga marrëveshjet e para është marrëveshja që ne kemi bërë me Prokurorinë Antimafia në Itali vetëm një muaj pas krijimit të SPAK.
Në Shqipëri shohim shpesh vrasje mes grupeve kriminale për aktivitete që kanë kryer jashtë Shqipërisë dhe në një situatë të tillë është e domosdoshme bashkëpunimi me çdo strukturë jashtë”, tha ai. Ndër të tjera, kreu i SPAK Arben Kraja u shpreh, se bashkëpunimi me autoritet italiane kërkon besim.
Ai mori edhe shembuj të finalizimeve të operacioneve të ndërmarra ku tha, se janë sekuestruar miliona euro pasuri dhe tonelata me drogë. “Bashkëpunimi kërkon vullnet dhe besim dhe falënderoj edhe autoritetet italiane për këtë bashkëpunim dhe besimin që na dhanë.
Skuadra e përbashkët me prokurorinë e Barit një aktivitet që ka vazhduar rreth 4 vite dhe që u finalizua këto dy vite, në Shqipëri kemi 43 të arrestuar që po gjykohen, miliona euro pasuri të sekuestruara, mbi 7 ton drogë e kapur gjatë operacioneve”, tha Kraja.
