Nga Adriatik Doci
Ish-anëtarja e Gjykatës së Lartë, Arjana Fullani, bashkëshortja e ish-guvernatorit të Bankës së Shqipërisë, Ardian Fullani, nuk i ndahet sistemit të drejtësisë. Pas këmbënguljes për t’u larguar nga drejtësia si gjyqtare, para se të përballej me procesin e Vetingut, Fullani ka nisur të ushtrojë profesionin e avokates.
Zonja Fullani u largua nga Gjykata e Lartë në korrik të 2017, ndonëse sipas ligjit mund të qëndronte në detyrë pa limit kohor, deri kur të zëvendësohej, ndërsa në me 29 janar të 2018 është regjistruar si person fizik pranë Qendrës Kombëtare të Biznesit për të filluar ushtrimin e veprimtarisë ekonomike private në profesionin e avokatit. Pavarësisht largimit nga Gjykata e Lartë, Fullani, sipas Komisionit të Vetingut, nuk e humbi statusin e magjistrates, pasi kishte të drejtë të shërbente si gjyqtare në Gjykatën e Apelit. Për rrjedhojë, për Fullanin nisi Vetingu në mars të 2019.
Në pill të 2019, Arjana Fullani i dërgon një shkresë KPK-së ku njofton se nuk dëshiron të shërbejë më në drejtësi. Megjithatë, KPK-ja ka pohuar se ajo e gëzonte ende statusin e magjistratit. Çështjen e ka zgjidhur Këshilli i Lartë Gjyqësor, i cili me prill të 2019 vendosi mbarimin e statusit të magjistratit për Arjana Fullanin. KLGJ e mori këtë vendim pasi zonja Fullani, kishte konfirmuar vullnetin e saj se ‘nuk dëshiron të emërohet si gjyqtare në nivel Apeli as tani dhe as në të ardhmen’.
Me këtë lëvizje, zonja Fullani evitoi jo vetëm përballjen me Vetingut, por në të njëjtën kohë shmangu edhe rrezikun e mundshëm të heqjes së të drejtës për të ushtruar profesionin e avokates. Ligji i ri për profesionin e avokatit, në nenin 13 pika ‘e’ parashikon ndalimin për t’u bërë avokatë të të gjithë prokurorëve dhe gjyqtarëve që janë shkarkuar nga detyra me vendim të formës së prerë nga organet e Vetingut. Gjatë shqyrtimit të ligjit në vitin 2018, pati lobime dhe tentativa të hapura për ta hequr këtë nen, por pas këmbënguljes së ndërkombëtarëve, u miratua. Në këtë mënyrë të gjithë gjyqtarët dhe prokurorët që kanë dhënë dhe do japin dorëheqjen nga drejtësia mund të bëhen avokatë, ndërsa të shkarkuarit, jo.
Bazuar në vendimin e KLGJ për mbarimin e statusit, Komisioni i Pavarur i Kualifikimit, në korrik të 2019, vendosi të ndërpresë procesin e Vetingut për Arjana Fullanin. Në këtë vendim, KPK vendosi edhe shënimin: ‘Të deklarojë humbjen e së drejtës së këtij subjekti për t’u emëruar gjyqtar ose prokuror i çdo niveli, anëtar i Këshillit të Lartë Gjyqësor ose i Këshillit të Lartë të Prokurorisë, Inspektor i Lartë i Drejtësisë ose Prokuror i Përgjithshëm, për një periudhë 15-vjeçare”. Ndërkaq, edhe pse kishte deklaruar për KLGJ se ‘nuk dëshiron të emërohet si gjyqtare në nivel Apeli as tani dhe as në të ardhmen’, Arjana Fullani nuk është dakord me heqjen e të drejtës për 15 vjet për t’u bërë pjesë e drejtësisë. Këtë penalizim të parashikuar në vendimin e KPK (shkalla e parë e Vetingut), Arjana Fullani i ka kërkuar Kolegjit të Posaçëm të Apelimit që ta shfuqizojë.
