Lojtarët e Kombëtares po bëjnë planet për sezonin e ri, duke dashur të ingranohen shpejt me formacionin në kuadër të kampionateve respektive, por edhe me ambicie për të rritur kreditet e tyre, për të pasur më shumë minuta në fushë dhe për të qenë protagonistë e liderë në ekipet respektive në ligat ku aktivizohen.
Duhet thënë se një nga lojtarët e Kombëtares me pritshmëri të mëdha është Armando Broja. Ai është pjesë e ?elsit në Premier League angleze, por prej gati 10 muajsh nuk është aktivizuar fare si pasojë e një dëmtimi të rëndë që e mban prej kaq kohësh jashtë fushave.
Por Broja po e kalon dëmtimin dhe deklaratat e fundit të tij bindin se ai është i uritur dhe mezi pret të startojë sezoni e të japë kontributin e tij në fushën e lojës.
Ndërkohë, lojtarët e tjerë të përfaqësueses janë kthyer pranë skuadrave të tyre dhe kanë nisur seancat stërvitore, por dy prej tyre një mbrojtës e një sulmues, sikurse janë Elseid Hysaj dhe Myrto Uzuni, i kanë humbur seancat e para me ekipet respektive, konkretisht Lacio dhe Granada.
Broja, rikthimi do të jetë i madh
Armando Broja ka hedhur pas krahëve dëmtimin në ligamentin e gjurit dhe është rikthyer në stërvitjen parasezonale me ?elsin. Sulmuesi i kombëtares pret një sezon të madh teksa në një prononcim për kanalin zyrtar të klubit anglez në rrjetet sociale, theksoi se ndjehet mjaft i lumtur që rikthehet sërish mes shokëve të skuadrës.
“Ndjehem shumë mirë për faktin që jam rikthyer në stërvitje dhe jam sërish mes shokëve të skuadrës, është mirë të ndihesh sërish pjesë e grupit. Isha për një kohë të gjatë larg skuadrës dhe nuk ishte aspak e lehtë të qëndroja ashtu i “vetmuar”.
Por, jam i lumtur që jam me shokët dhe po shijoj sërish fushën. Kam gjetur forcat dhe energjinë për të nisur punën pak më herët këtë sezon dhe tani jam me skuadrën në fazën përgatitore, jam shumë i lumtur.
Pres një sezon të madh ndaj më duhet të përgatitem, nuk është e lehtë të kthehesh pas një dëmtimi aq të rëndë. Ndaj, jam i lumtur dhe falenderues që jam rikthyer përsëri pranë skuadrës. Tani mendoj vetëm të rikthehem në formën e duhur dhe më pas të vazhdoj nga aty për të zhvilluar një sezon të madh”, u shpreh Broja.
Hysaj dhe Uzuni humbin seancat e para stërvitore me ekipet e tyre
Lacio ka nisur sot përgatitjet për sezonin e ri dhe futbollistët i janë nënshtruar vizitave mjekësore. Por, në qendrën mjekësore të Lacios, ka munguar Elseid Hysaj i cili ka pasur leje për një ditë më shumë për të qëndruar.
Kështu, kapiteni i Kombëtares do të bashkohet me skuadrën ditën e nesërme dhe së bashku me Imobilen, do të kryejnë vizitat mjekësore në mëngjes e më pas do të nisin përgatitjen. Në stërvitjen e parë ka munguar edhe sulmuesi Myrto Uzuni.
Sulmuesi i Granadës ka një leje më të gjatë nga klubi dhe do të rikthehet në stërvitje pas pak ditësh. Shkak për këtë, është bërë angazhimi që Uzuni ka pasur me Kombëtaren shqiptare.
Në kohën kur shumë lojtarë kishin marrë pushimet, Uzuni ishte me Shqipërinë duke mos pushuar dhe për këtë, Granada ka menduar që t’i kompensojë. Në shtator, dy kuqezinjtë do të kenë peshë në duelet e rëndësishme e vendimtare ndaj ?ekisë në transfertë dhe Polonisë në Tiranë.
