Armando Broja është gati të rikthehet në fushë nga dëmtimi i gjatë dhe këtë do ta bëjë duke marrë minuta me ekipin U-21 të Çelsit në ditët e ardhshme. Kështu të paktën thuhet në një artikull të “The Daily Mail”, ku pretendohet se sulmuesi i Kombëtares shqiptare është rikthyer në stërvitje të plotë me Blutë në Kobham (qendra stërvitore e bluve).
Pas dëmtimit të ligamentit në muajin dhjetor në një miqësore kundër Aston Vilës, futbollisti do të luajë të paktën një nga ndeshjet për ekipin U-21. Në kalendar, skuadra e të rinjve u përball dje me Lutonin, teksa Broja nuk ishte, por për të zbritur në fushë është projektuar takimi i së premtes kundër Mançester Sitit U-21 dhe ndaj Northampton U-21 të martën e ardhshme.
Ky është një lajm fantastik për t’u dëgjuar në një kohë kur kërcënimi për golin te Çelsi duket po aq i paefektshëm sa dy sezonet e fundit. Shpresat nuk po vendosen të gjitha te talenti i Brojës për të zgjidhur problemet e ekipit, por do të jetë një nxitje e madhe për skuadrën kur ai të mund të konkurrojë me Nikolas Xhekson për pozicionin e numrit 9 në sulm.
Mund të duhet pak kohë që Broja të arrijë shpejtësinë e plotë pas kaq kohësh në fushë. Megjithatë, ia vlen të theksohet se një tjetër pushim i ekipeve kombëtare është në tetor. Poçetino luajti një rol vendimtar në kthimin e Herri Kejnit në një sulmues të klasit botëror, kështu që ai mund të bëjë magjinë e tij dhe të bëjë diçka të ngjashme, pasi të ketë një Broja plotësisht të aftë në skuadrën e tij.
Ata që presin me padurim rikthimin e Brojës janë tifozët kuqezi, por Silvinjo lë të kuptohet se nuk dëshiron të nxitohet, pasi duhet të marrim një konfirmim të qartë në lidhje me gjendjen e tij, për këtë arsye do të fluturojë drejt Londrës këtë javë për të folur me stafin e Çelsit, për të kuptuar nëse ekziston mundësia që Broja të përfshihet në lisën e lojtarëve të grumbulluar për sfidën kundër Republikës Çeke më 12 tetor.
