Grabitet me maska dhe armë banesa e një biznesmeni në Fushë- Krujë. Katër persona morën nën kërcënimin e armëve automatike, para, bizhuteri dhe automjetin e familjes dhe më pas janë larguar në drejtim të paditur, duke përfituar nga errësira. Sipas Policisë, kanë qenë katër persona të armatosur, që kanë hyrë në shtëpinë e biznesmenit Blerim Kaloshi në Fushë-Krujë ku veç tij i morën një shumë parash edhe nipit të tij.
Në total, shuma e grabitur është 4 milionë lekë të vjetra, ku 2.5 milionë iu grabitën të zotit të shtëpisë dhe 1.5 milionë të tjera nipit të tij. Ngjarja është regjistruar mbrëmjen e së dielës, rreth orës 21:30, ndërsa Policia ka nisur hetimet për zbardhjen e saj, identifikimin dhe arrestimin e autorëve.
Mësohet se Policia e Fushë-Krujës ka shoqëruar disa persona, por ende nuk ka një të dyshuar. Kryefamiljari Kaloshi është shprehur se autorët ishin katër persona, dy me kallashnikovë e dy me pistoleta, që të gjithë të maskuar.
Në dëshminë e tij, dhënë në Polici, 36-vjeçari tregon se u ka hapur derën dhe më pas, nën kërcënimin e armëve, është detyruar t’u japë një shumë prej rreth 2.5 milionë lekë të vjetra, që kishte në shtëpi.
“Ishin katër persona. Të katër të maskuar dhe në duar mbanin armë, dy pistoleta, ndërsa dy të tjerë kallashnikovë.
Na vunë pistoletën në kokë dhe na kërcënua se do të na vrisnin po të mos u tregonim se ku i kishim paratë. U tmerruam. U dhamë 2.5 milionë lekë, po ata nuk u larguan, kërkonin para të tjera. Mendonin se kishim më shumë lekë gjendje. Kështu, njëri na mbante armën drejt me qëllim që të mos bënim asnjë lëvizje, ndërkohë të tjerët kontrollonin nëpër shtëpi. Morën ca gjetën, bizhuteri të ndryshme”, ka pohuar për Policinë kryefamiljari.
Por autorët duket se nuk kanë qenë të kënaqur, ndaj në kërcënimin e armëve, kanë kontrolluar banesën dhe kanë marrë gjithçka që u dukej me vlerë.
“Përpara se të largoheshin, më mbyllën në banjë, me qëllim që të largoheshin të pashqetësuar”, ka shtuar 36-vjeçari.
Por para se autorët të largoheshin, në banesën e familjes Kaloshi ka mbërritur nipi i 36-vjeçarit, i cili ka rënë gjithashtu pre e grabitësve. Nipi, që banonte afër, ka pikasur se diçka nuk shkonte dhe ka rendur drejt banesës për të parë se çfarë po ndodhte. Por në momentin që është ngjitur në katin e sipërm, atij i dolën përpara dy persona të armatosur, të cilët i kanë kërkuar të futej brenda. Të riut i janë marrë 1.5 milionë lekë që kishte me vete dhe makina personale, të cilën e përdorën për t’u larguar nga vendi i ngjarjes. Burime për gazetën thanë se, familja Kaloshi jeton në një vile 3-katëshe, ku kati i parë është përshtatur për biznes. Në katin e parë, familja Kaloshi, e vetëpunësuar, kishte një dyqan ushqimor dhe një lokal të vogël.
