Avokati i njohur Idajet Beqiri ka komentuar zhvillimet e fundit si dhe operacionin e bujshëm të SPAK. Beqiri shprehet se strukturave të SPAK-ut dhe gjithës strukturave të tjera që luftojnë dhe parandalojnë krimin në vendin tonë nuk iu mungon asgjë t’i hetojnë këto krim edhe pa patur një të penduar si Dumani për të nisur operacione të këtij lloji.
“Po pritëm të kemi të penduar dhe nuk do të organizojmë luftën kundër kriminalitetit me të gjitha llojet e mjeteve që kemi në dorë për t’i zbuluar dhe parandaluar ato siç duhet dhe mjetet janë të shumta. Atëherë organet ligjzbatuese nuk janë në rolin e tyre.
Situata të tilla nxjerrin në faktin që duam apo s’duam ta pranojmë ne, me dhimbje e pranojmë që institucionet që luftojnë krimin në këtë vend, posaçërisht policia e Shtetit, SPAK-u, prokuroritë e rretheve, gjykatat e të gjitha shkallëve, vetë gjykata e Posaçme, nuk flas për emra të përveçëm por edhe brenda këtyre institucioneve, qoftë edhe punonjës dytësorë nxjerrin sekrete dhe i dekonspirojnë aksionet. Për rrjedhojë krimineli fshihet.
Dhe jo vetëm individi por është institucioni dhe struktura e tij, mënyra sesi i kontrollon, si i bën rekrutimet e të tjera dhe ana tjetër ajo sesi i godet kur dalin gjëra të kësaj natyre. Sepse edhe megjithëse dalin ne nuk i hetojmë. Edhe në këtë aspekt këto institucione duhet ti kenë parasysh këto gjëra krahas sukseseve.
Krijimi i strukturës së SPAK, i BKH-së janë dhuratat më të bukura që i kanë bërë kombit Shqiptar, Shtetet e Bashkuara të Amerikës, pra janë struktura që kanë ideuar dhe u formësuan si dhe po mbështeten fort financiarisht dhe me bazë logjistike nga SHBA-të. Nga ana tjetër buxheti i shtetit Shqiptar edhe pse është më i varfri në Evropë, çdo prokurori të SPAK-ut, i jep 5 mijë euro në muaj.
Pra nuk mund të thonë më që jemi të varfër dhe varfëria na bën që t’i shtrijmë dorën edhe tek krimi edhe tek krimineli. Stepja vjen për dy arsye, e para pasi politika përsëri ka ndikim në SPAK, sepse këta prokurorë që kemi në SPAK, kam respekt për shumicën e tyre, por gjithsesi ata kanë qenë në Shqipëri dhe dikush e ka ngjyer dorën e vet”, u shpreh Beqiri për Dritare TV.
