Në një artikull mediat serbe kanë shkruar se një shtetas serb, i cili punon si ekspert IT është arrestuar pasi akuzohet për spiunazh në Serbi për llogari te Shërbimit Informativ të Shqipërisë.
Lajmin e kanë bërë të ditur mediat serbe, sipas të cilave, nga hetimet dhe mbledhja e provave materiale ndaj shtetasit me iniciale D.R, pjesëtarët e BIA-s gjetën një aparat fotografik dhe një panel diellor që furnizonte kamerën, si dhe një kartë memorie.
Sipas mediave serbe, dyshohet se që nga viti 2022, shtetasi me inicialet D.R, me një rrjet bashkëpunëtorësh të tij, ka mbledhur të dhëna për anëtarët individualë të shërbimeve të sigurisë të Serbisë dhe serbët nga Kosova. Sipas mediave serbe, ai në disa raste ka filmuar edhe lëvizjet e forcave të sigurisë serbe në zonën e komunës së Rashkës.
Eksperti i sigurisë Drizan Shala tha në një intervistë televizive se kapja e spiunit serb është një ngjarje e sajuar nga BIA.
Sipas tij, as shërbimi sekret shqiptar dhe as ai i Kosovës nuk kanë nevojë për një spiun serb.
“Për të qenë i saktë ky informacion duhet të kishte kaluar në filtrin e policisë dhe prokurorisë dhe gjykatës. Kjo dëshmon se është një veprim i sajuar i strukturave të Serbisë. Ai akuzohet për gjoja spiunim të bazave ushtarake të Serbisë, gjoja ka tentuar të marrë informacione për operacione të strukturave serbe. Për masën shitet sikur SHISH dhe AKI janë të përfshira në shtetin e Serbisë që mund të nxisë veprimet e grupeve ekstremiste në institucionet e Kosovës, këto struktura s’e kanë të nevojshme ta bëjnë një gjë të tillë se kanë partnerët ndërkombëtarë në ato hapësira”, tha Shala.
