Ka mbaruar pas pesë orësh diskutime mbledhja e Këshillit Politik dhe pas dakordësi me palëve lidhur me propozimin e Opozitës i cili mundëson hapjen e listave 100 %, pa ndryshime të tjera në formulën e koalicioneve.
Opozita ka propozuar një amendament kushtetues për hapjen 100% të listave për deputetë dhe lajmëron se nuk do të pranojë asgjë tjetër veç këtij kushti. Gjatë mbledhjes opozita jashtëparlamentare ka propozuar amendament kushtetues për hapjen e listave 100 %, duke thënë se për arritjen e kësaj duhet vetëm të shfuqizohet në nenin 68 të kushtetutës vetëm fjalia e tretë e pikës 1 dhe nuk ka më nevojë për prekjen e Kushtetutës.
Neni 68, pika 1 thotë se: 1. Kandidatët për deputetë paraqiten në nivel zone zgjedhore nga partitë politike, koalicionet zgjedhore të partive politike, si dhe nga zgjedhësit. Një kandidat mund të paraqitet vetëm për një nga subjektet propozuese, sipas kësaj pike. Renditja e kandidatëve për deputetë në listat shumemërore nuk mund të ndryshohet pas paraqitjes së listës në komisionin zgjedhor përkatës. Rregullat për regjistrimin e kandidatëve për deputetë përcaktohen në ligjin për zgjedhjet.
Opozita jashtëparlamentare kërkon që të shfuqizohet fjalia e tretë “Renditja e kandidatëve për deputetë në listat shumemërore nuk mund të ndryshohet pas paraqitjes së listës në komisionin zgjedhor përkatës” dhe kjo mundëson hapjen e listave pa pasur nevojë për ndërhyrje të tjera dhe ndryshime kushtetuese. Madje sipas opozitës kjo nuk pengon as koalicionet parazgjedhore pasi përcaktimi i kritereve dhe rregullave për zbatimin e sistemit zgjedhore proporcional, zonave zgjedhore dhe numërimit të mandateve është e rregulluat në Kodin Zgjedhor dhe jo Kushtetutë dhe kjo përcaktohet në pikën 3 të nenit 64.
