Koordinatori i Bindjes Demokratike Astrit Patozi komenton rolin e partnerëve ndërkombëtarë për të zgjidhur krizën politike në Shqipëri. Ai foli për deklaratën e kryedemokratit Lulzim Basha në Shkodër, i cili tha se zgjidhja nuk ka për të ardhur nga jashtë.
Patozi tha:
“Jo, absolutisht. Jam plotësisht i bindur se, sa më shumë të rëndohet situata politike në Shqipëri, aq më shumë nevojë kemi për partnerët tanë ndërkombëtarë. Deklaratat patetike të këtyre sovranistëve të vonuar, që e ushtrojnë këtë profesion part time, gjithmonë më kanë shkaktuar humor.
Sepse më kujtohet ajo seanca e parlamentit për Reformën në Drejtësi, kur ngritën kartonin jeshil plot 140 deputetë, madje do të kishim qenë 141, bashkë me Lulzim Bashën, i cili erdhi në llozhë për të duartokitur, ngaqë nuk kishte mundësi të votonte. Po ashtu, mbaj mend ato paralajmërimet për protesta, që do t’i vinin flakën Tiranës, të cilat pas vetëm një telefonate nga larg, përfundonin me kordone militantësh që i dhuronin lule policëve.
Duhet ta pranojmë se gjëmat më të mëdha ne i kemi bërë atëherë kur është zbehur pak vëmendja ndërkombëtare apo kur na kanë lënë që t’i gjejmë zgjidhjet vetë, me shpresën se mund t’ia dilnim edhe pa ata. Dhe për shembuj nuk ka nevojë të shkojmë larg. Sepse në të tilla raste, ose bëjmë pazar të pisët si më 17 maj, ose e çojmë vendin deri në buzë të greminës, si më 30 qershor të këtij viti.
Ndaj edhe investimi i tyre, sidomos tani që jemi në krizë, është i pazëvendësueshëm dhe i dosmodoshëm.
Ndërkohë, uroj shumë që edhe të huajt që merren me Shqipërinë ta kuptojnë se kjo nuk është thjesht një krizë e personazheve të rëndësishëm politikë, që mund t’i kenë lodhur edhe ata gjithë këto vite, po se këtu është në krizë të thellë kryesisht sistemi politik.”
