Pas refuzimit ditën e enjte, për shkak të pjesëmarrjes në seancën parlamentare, tre zyrtartë e PD-së u paraqitën sot në Prokurorinë e Krimeve të Rënda. Ervin Salianji, Enkeljd Alibeaj dhe zyrtari i PD, Gazment Bardhi do të japin shpjegime lidhur me audio-përgjimin e publikuar në media. Bashkë me zyrtarët e PD-së në Prokurori është thirrur edhe gazetari që mori përsipër përgjimin, Jetmir Olldashi.
Një javë më parë Agron Xhafaj bëri kallëzim penal ndaj tre deputetëve, duke pretenduar se përgjimi audio është montazh. Ndërkohë të mërkurën Agron Xhafaj u vetëdorëzua para autoriteteve italiane në Itali, ndërsa vetë kryeministri Rama tha se ka bërë një ekspertizë ndërkombëtare të materialit, dhe sipas tij është një mashtrim për destabilizim.
Por vetëm një ditë më pas, u publikua dhe video dëshmia e Dëshmitarit X, Albert Veliu ndërsa gazetari Jetmir Olldashi pranoi se është autori i përgjimit. Ndërkaq, kreu i policisë së shtetit Ardi Veliu ka zhvilluar edhe sot një takim në Prokurorinë e Krimeve të Rënda.
Menjëherë pasi ka dhënë ka dhënë dëshminë e tij në Prokurori, lidhur me audio-përgjimin e publikuar nga PD, deputeti i kësaj partie Ervin Salianji, ka shpërthyer në akuza ndaj prokurorisë dhe qeverisë.
Prokurori po pengon hetimin e çështjes, Agron Xhafaj është larguar nga Shqipëria dhe prokuroria po merret me kallëzimin e rremë të tij në vend që të merret me kapjen e grupit të strukturuar kriminal duke vonuar zbulimin e këtij grupi
Këto veprime tregojnë edhe një herë vërtetësinë e akuzave nga PD, për bashkëpunimin e ngushtë në mbrojtje të krimit nga binomi qeveri-prokurori
Prokuroria është 100 % në dispozicion të qeverisë, por gjithsesi ne nuk shmangim detyrimin ligjor për të shkuar në Prokurori. Ka një deklarim publik të gazetarit që më ka sjellë një pjesë të audio-përgjimi, ka prova kundër vëllait të Xhafajt, pasi aty dëgjohet një trafikant, që sipas Salianjit, i thotë bashkëpunëtorit X se: ‘me 10 kg mos më hajde, unë flas për 100 e sipër’.
