Një ngjarje e rëndë, që për fat të mirë nuk ka përfunduar në tragjedi, është regjistruar mbrëmjen e kësaj të premte, ku një autobus i Unazës është përplasur me një makinë duke përfunduar në Lanë e duke lënë 5 persona të plagosur.
Report Tv mëson se të plagosur, që për fat të mirë ndodhen jashtë rrëzikut për jetën janë shoferi i autobusit Muhamet Kyçyku, fatorino A. K., 61 vjeç, pasagjerja F. Ç., 64 vjeçe, si edhe 2 të rinjtë që po udhëtonin në makinën e vogël, Jurgen Rama 27 vjeç shoferi dhe A. H., 27 vjeç, pasagjeri i mjetit.
Siç shihet në pamje, autobusi “Go Green” është “shndërruar” në urë duke zënë poshtë makinën. Ka qenë ndërhyrja e 2 banorëve të zonës të cilët kanë bërë të mundur nxjerrjen e menjëhershme të 2 të rinjve nga mjeti që kishte zënë autobusi dhe më janë dërguar me shpejtësi në spitalin e Traumës.
I pranishëm në vendin e ngjarjes ka qenë edhe kryebashkiaku i Tiranës, Erion Veliaj, i cili tha se fat të mirë, nuk u regjistrua në tragjedi, teksa bëri me dije se makina dhe autobusi do të hiqen nga Lana me fadromë ose vinç.
“Për sa kohë jeta e njeriut është jashtë rrezikut, do i gjejmë një mënyrë me vinc ose jo për t’i nxjerrë nga Lana. Zoti na ndihmoi të mos kishim një tragjedi në Tiranë”, tha Veliaj.
Nga ana tjetër, ministrja e Shëndetësisë, Ogerta Manastirliu vizitoi të plagosurit në spital, ku tha se kanë marrë dënimte të lehta, të rekuperueshme.
“Keni shpëtuar për mrekulli, ka qenë realisht një mrekulli. Falë zotit keni shpëtuar. Me dëmtime të lehta të rekuperueshme thonë mjekët. Unë qëllova aty. Ishin dy çuna të lagjes që ju kanë nxjerrë. Ambulanca ka ardhur në kohë. I kemi nxjerrë në kohë reale. Direkt ka ardhur ambulanca”, tha Manastirliu.
Grupi hetimor po punon për sqarimin e rrethanave të aksidentit, ku nga sa është raportuar paraprakisht makina i ka prerë rrugën autobusit, megjithatë vijojnë hetimet për të zbardhur të plotë të gjithë ngjarjen.
