Avokati Spartak Ngjela deklaroi dje se politika në Shqipëri për vitin 2020 do të jetë i vështirë. Në një intervistë televizive, Ngjela e nisi diskutimin e tij me fondin e emergjencës. Pas tërmetit të 26 nëntorit, qeveria shqiptare deklaroi se nuk ka fonde të emergjencës. Kjo sipas Ngjelës është krim dhe se duhet të hetohet, ndërsa nuk ngurroi të hedhë akuza për qeverinë dhe drejtësinë shqiptare.
“Ky do jetë vit i vështirë për politikën shqiptare sepse kryeministri shqiptar nuk ka fond për emergjencën. Është krim penal, por këtu nuk ka shtet, nuk ka prokurori, se ç’do bëjë SPAK, nuk e di. Kjo është njëra anë e medaljes. Ana tjetër është reforma në drejtësi e cila do të vazhdojë në formë drastike. Cilët do të jenë të kontrolluarit e parë nga liderët e mëdhenj kjo pritet për t’u parë. Edhe BKH është drejt konstituimit të saj, gjithçka po shkon drejt pastrimit që kërkon t’i bëjë politika amerikane dhe kjo europiane, korrupsionit shqiptar”, deklaroi Ngjela.
Përpos akuzave, ky i fundit u shpreh pozitiv ndaj BKH-së. Ndërsa nga një anë tregohet i dyshimtë me drejtësinë për të luftuar krimin dhe korrupsionin, nga ana tjetër deklaron se politika amerikane nuk mund të dështojë në Shqipëri.
“Rezultati është në funksion të hetimit dhe nuk mund të shkelen ligjet. Ata që do merren në hetim, do shihen kanë shkelje apo s’kanë shkelje. Po nuk kanë shkelje s’kanë pse. Pse regjimi Enver Hoxhës kthehet? Jo. Sukses do të thotë të gjejnë provat, po ata i kanë provat. Hetimi do funksionojë edhe do ketë rezultate, si mund të dështojë politika amerikane në vendin më të korruptuar të Europës. Si mund të dështojë politika amerikane, për një gjë që është zotuar tre herë botërisht. A e patë se çfarë force ka, as i pyeti fare ata që thoshin se janë forca më e madhe e Lindjes së Mesme, ju rriti sanksionet”, tha Ngjela.
Ky i fundit gjithashtu foli edhe për marrjen e Presidencës së OSBE-së nga Shqipëria këtë vit, duke hedhur akuza pa fund për Ramën. “Ju keni Ramën, drejton OSBE sot e kuptoni se ç’bën Shqipëria? Një kryeministër që ka manipuluar tre zgjedhje me dorën e tij, drejton institucionin që kontrollon zgjedhjet e lira në pjesën më të zhvilluar të Botës, e kuptoni ku jemi? Po nuk është faji i tyre, është faji i shqiptarëve që zgjedhin kryeministra të tillë. Pas reformës në drejtësi nuk besoj se shqiptarët do vazhdojnë të zgjedhin njerëz të korruptuar në poste drejtuese”, tha ai.
