Avokat Spartak Ngjela ka paralajmëruar se pas ish-Kryeprokurorit Adriatik Llalla, në bankën e të akuzuarve do të përfundojnë politikanë dhe zyrtarë të lartë. Ditën e djeshme Struktura e Posaçme Antikorrupsion ka kërkuar 2 vite burg për të.
Lidhur me këtë gazeta ka kontaktuar dje avokatin e njohur Spartak Ngjela, i cili tha se kjo tregon që institucionet kanë filluar seriozisht punë kundër korrupsionit dhe kriminalizimit në vend. Sipas tij, me dënimin që i jepet Llallës, SPAK tregon se tani e kanë radhën të korruptuarit të nivelit të lartë politik, sepse Llalla është në nivelin fillestar, pra hyn tek “peshqit e vegjël”.
Ndërsa, me ndërhyrjen edhe nga SHBA SPAK do të fokusohet tani tek “peshqit e mëdhenj”. “Lufta antikorrupsion ka filluar dhe kjo është e dukshme tani. Lufta antikorrupsion ka filluar me Gjykatën e Posaçme. Prisni dhe do të shihni gjëra më të mëdha. Me kalimin e kohës do të shikoni ndëshkime dhe arrestime më të mëdha. Për luftën antikorrupsion nuk është gjë Llalla, duke marrë parasysh për çfarë do të shohim më vonë, Llalla është nga peshqit e vegjël, do të ketë gjëra më të rënda se kaq, duke kaluar në zyrtarë të lartë të politikës shqiptare”, tregoi Ngjela.
Avokati paralajmëroi arrestime dhe intensitet në luftën kundër korrupsioni që ditën kur Gjykata e Posaçme kaloi për gjykim dosjen e ish-prokurorit Llalla. Sipas Ngjelës, tani është hapur rruga për hetimin e politikanëve dhe pritet që arrestimet do fillojnë nga të majtët. Prandaj, ai paralajmëron se në ditët në vijim do të shohim arrestime të bujshme, pse jo dhe para zgjedhjeve. “Tani kemi një situatë të re edhe kundrejt korrupsionit të lartë shtetëror, dhe mendimi im është që kjo do vazhdojë. Si do vazhdoj? Shenjat janë që do vazhdojë duke goditur ose duke marrë në pyetje korrupsionin e majtë në fillim, sepse kjo është teoria e goditjes penale në sensin modern. Kjo sepse, këta janë në pushtet.
Në rast se do fillonte djathtas lufta antikorrupsion, atëherë do shikonim se të djathtët do godisnin të majtët duke argumentuar se kjo që po ndodh është reformë politike. Dhe shumë mirë që SPAK-u filloi me të majtët. Tani, kjo kështu do vazhdojë, ky është mendimi im, prandaj mendoj se do të shohim dhe të tjerë nën akuzën e korrupsionit, sepse edhe Byroja Kombëtare e Hetimit është gati duke u formuar”, u shpreh ai në një reagimin për gazetën “SOT”.
Klima politike
Sipas avokatit Spartak Ngjela, klima politike në vend është e nxehtë për shkak se politikanët janë të frikësuar se SPAK mund të veprojë para zgjedhjeve. Ngjela tha se situatën nuk e tensionojnë dot thirrjet për grusht shtetit apo përmbysje qeverie që bën Meta, sepse ai nuk mund t’i pengojë zgjedhjet e 25 prillit dhe formimin e qeverisë së re. Për avokatin, Meta bën këto veprime sepse është i trembur nga drejtësia dhe duke qenë më i frikësuari nga të gjithë politikanët është ai që reagon më shumë.
Pra tensioni i vërtetë vjen nga frika e arrestimeve. “Nuk kemi më çfarë të themi për Metën dhe Berishën. Meta nuk mund të ndërhyjë në zgjedhje. Këto që bën i ka nga frika e reformës dhe çrregullimet që po i shfaq çdo ditë. Nuk ka çfarë bën ai, zgjedhjet erdhën, kush do marrë më shumë vota do fitojë. Nuk merret njeri me broçkullat e një presidenti të trembur”, u shpreh ai. Edhe disa ditë më parë, i pyetur nga gazeta Ngjela u ndal tek zërat se presidenti Ilir Meta mund të bllokojë formimin e qeverisë së re nëse Partia Socialiste del forcë e parë, por nuk merr 71 mandate.
Prerë dhe qartë, avokat Ngjela theksoi se ky është një debat i kotë, pasi sipas tij, kjo gjë është rregulluar nga Kushtetuta e Republikës së Shqipërisë që thekson se partia e parë mandatohet nga kreu i shtetit të nisë punën për formimin e qeverisë.
