Pas protestës së djeshme të Azbi Kasës, që mallkoi Metën pse nuk e thirri në takim, sot ka një reagim pozitiv të tij, pasi Meta u takua me Koçon, i cili është kryetar i partisë në të cilën kandidoi fillimisht Azbiu. Jari përcolli për fansat e vet letrën e Azbiut
“Të dashur demokratë,
Jari ju sqaron!
Më poshtë lexoni reflektimin e Azbiut, pas takimit të Ilir Metës me Koçon.
I nderuar President!
Unë si përfaqësues autentik i popullit, t’i them gjërat troç. Sot ma ke bërë zemrën mal kur të pashë me Koçon në takim.
Sa për dijeni unë hyra në këto zgjedhje se më kërkoi Koço për kandidat në Këlcyrë. Kam tërë jetën që kandidoj për Partinë Komuniste dhe thashë të bëhem një herë me një parti kapitaliste.
Por nuk ishte e thënë. Ai ndërroi mendje dhe nuk do të hyjë në zgjedhje. Sidoqoftë unë do vazhdoj garën.
Kur e pashë që u takuat bashkë, mu bë zemra mal, se mendova që ke lexuar letrën time dhe ke reflektuar.
Tani me ju të dy kam vetëm një problem.
Së pari me Koçon.
Ky njeri u regjistrua i pari për zgjedhje dhe u tërhoq po i pari. Pra është një njeri që nuk mund t’i besosh deri në fund se të lë rrugëve.
Edhe ti i dekretove i pari zgjedhjet pastaj i ç’dekretove. Pra dhe ti je një njeri që nuk të krijon siguri.
Kjo mendoj se është pika lidhëse që u bashkon të dyve.
Unë në fakt prisja të dilje në televizor në orën 5, pasi kishe takuar ambasadoren amerikane dhe mendova se do t’ia përplasësh në fytyrë asaj siç e kemi zakon ne komunistët. Por kur pashë që nxore një djalë me syze thashë u tremb dhe ky.
Pastaj u qetësova se më thanë se ishe me Koçon. Në këto raste ai ta heq frikën si me magji.
Tani unë jam dakord me këto që thoni ju të shtyhen zgjedhjet, por dua siguri për dy gjëra. Kush më jep siguri mua që ti nuk e ç’dekreton prap datën tjetër dhe kush më jep siguri që Koçua nuk ikën prap nga zgjedhjet.
Ndaj që të të besojnë njerëzit duhet t’i vësh në be. Dhe që të bëjnë be, duhet që t’i mallkosh. “U rënt kanceri në grykë e mos bëfshin hajër që nuk besoni se nuk do t’i çdekretoj më zgjedhjet”. Po e bëre këtë më ke me vete.
I yti Azbiu!”
