I ftuar në emisionin “Shqip” nga Dritan Hila në “Dritare TV”, kreu i Partisë Balli Kombëtar Demokrat, Artur Roshi ka folur rreth elektoratit të partisë së tij, të cilin nuk ka arritur ta ruajë për të qenë sadopak pjesëmarrës në zgjedhje dhe për këtë fakt ai shpjegoi edhe arsyet.
Roshi shprehet se në politikën shqiptare nuk vlerësohen më idetë politike dhe se ndryshojnë sipas interesave. Sipas tij në ditët e sotme Berisha që është komunist, në Foltoren e tij thotë do të bëhet konservator.
“Fuqia politike nuk është se ka fuqi mendimi, këtyre iu duket sikur e kanë monopol fuqinë e mendimit. Por historia është pika e mbështetjes.
Berisha që është komunist, sot thotë do të bëhem konservator, këtë e thotë në Foltoren e tij. Foltorja boshtin e ka te konservatorizmi. Nuk lidhje individi por për idetë politike dhe them që jemi në një pikë vulgariteti politik.”, u shpreh Artur Roshi.
Roshi ka komentuar edhe situatën aktuale në PD dhe luftën mes Berishës dhe Bashës për të pasur lidershipin e PD. Ai shprehet se ai është proamerikan dhe nuk mund të bëhet dot kundër SHBA.
“Kam ende kënaqësi nga bashkëpunimi me Berishën dhe me humor në PD thoja që nga gjithë komunistët ky është më i miri. Berisha më ka vendosur kandidat që në 2005.
Unë nuk bëhem dot kundër SHBA dhe për këtë shkak u futa edhe në parlament dhe u bëra deputet. E kemi parë SHBA si dritën në fund të tunelit. Unë nuk kam qenë i preferuari i Bashës. Unë në garën mes Bashës dhe Berishës, jam me SHBA” u shpreh Artur Roshi.
Sipas Roshit, Partia Demokratike i ka vjedhur sistematikisht votat e Ballit Kombëtar Demokratik.
“Votat tona Partia Demokratike na i ka vjedhur në mënyrë sistematike, gjithmonë dhe kjo dihet. Na i ka marrë votat dhe kam shumë fakte por nuk kemi fuqi ku t’i publikojmë. Kur vajta të bëj negociata me PD, shkova me program dhe pika të cilat do njësoheshin në programin e PD por në fund PD vetën na vodhi votat.
Jemi të pafuqishëm për ta ndaluar këtë gjë dhe nuk i thuhet hajdutit mos vidh. Hajduti kur të vjedh nuk ta di për nder, të thotë isha i zoti t’i vodha.”, u shpreh Artur Roshi.
